Þriggja tíma páskabomba FM95BLÖ: Víðir Reynis í hitaklefanum og gamlar kempur kíktu við

Strákarnir í FM95BLÖ gerðu sér lítið fyrir og skelltu í þriggja tíma páskaþátt í dag til að gíra hlustendur inn í páskahelgina. Um er að ræða fyrsta skiptið sem FM95BLÖ er með þriggja tíma dagskrá og það á föstudaginn langa.

Gestir dagsins voru ekki af verri endanum, en gamlir FM95BLÖ meðlimir kíktu í heimsókn. Kittý Magg og graði maðurinn hjá Pétri Jóhanni létu sig ekki heldur vanta.

Þá tóku Auddi og Sveppi einn vinsælasta mann landsins um þessar mundir, Víði Reynisson yfirlögregluþjón, í hinn sívinsæla hitaklefa þar sem hann sat fyrir svörum. Um var að ræða fyrsta hitaklefa FM95BLÖ í mörg ár.

Strákarnir í FM95BLÖ halda áfram að safna pening fyrir Fjölskylduhjálp Íslands, greint var frá því í síðasta mánuði að Auddi myndi ekki fara í klippingu í sex vikur og stefndu þeir að því að safna milljón fyrir samtökin. Í dag komust þeir yfir þá upphæð.

Helstu fjáröflunarleiðir Fjölskylduhjálpar Íslands eru frjáls framlög frá almenningi og fyrirtækjum, Íslandsforeldra verkefnið þar sem hægt er að styrkja um fasta upphæð mánaðarlega, og fjáröflunarmarkaðir sem selja vörur á hagstæðu verði.

Fjölskylduhjálpin er með 2 starfsstöðvar, að Iðufelli 14 í Reykjavík og Baldursgötu 14 í Reykjanesbæ. Sjálfboðaliðar Fjölskylduhjálparinnar eru um 50 talsins. Hér má styrkja söfnun strákanna.

Hér að neðan má svo hlusta á þáttinn í fullri lengd.