Íslenska viðvörunin gæti spilað lykilhlutverk í hópmálsókn vegna skíðaparadísarinnar Ischgl

Bandaríska fréttaveitan Bloomberg birti í morgun ítarlega grein um fyrirhugaða hópmálsókn skíðaiðkenda gegn yfirvöldum í austurísku skíðaparadísinni Ischgl. Viðvörun frá íslenskum yfirvöldum um kórónuveirusmit á svæðinu er miðpunktur greinarinnar. Lögfræðingur hóps Þjóðverja sem eru hluti af málsókninni spyr af hverju yfirvöld hafi ekki strax gripið inn í eftir að viðvörunin barst frá Íslandi

Eins og komið hefur fram hafa yfirvöld í Týrol-héraði Austurríkis sem og hótel- og bareigendur á skíðasvæðinu Ischgl verið harðlega gagnrýndir fyrir hæg viðbrögð við kórónuveirusmiti sem virðist hafa grasserað þar í febrúar og mars. Ekki síst vegna þess að í ljós hefur komið að Þórólfur Guðnason sóttvarnarlæknir  sendi þeim viðvörun um að skíðabærinn Ischgl í austurrísku Ölpunum væri skilgreint sérstakt áhættusvæði vegna kórónuveirunnar.

Í vikunni birti austurrískur fjölmiðill tölvupóst þar sem sjá má að íslensk yfirvöld sendu sama dag nokkuð greinargóðan tölvupóst til austurríska yfirvalda um smit sem rakin voru til Ischgl. Tölvupósturinn virðist hafa haft lítil áhrif þar sem skíðasvæðinu var ekki lokað fyrr en viku síðar. Skíðasvæðinu hefur meðal annars verið lýst sem staðnum sem sýkti hálfa Evrópu af kórónuveirunni.

Í frétt Bloomberg segir að yfir fimm þúsund manns hafi skráð nafn sitt á fyrirhugaða hópmálsókn gegn yfirvöldum í Týrol-héraði. Tölvupósturinn sem íslensk yfirvöld sendu vekju upp nýjar spurningar og setji meiri pressu á yfirvöld í héraðinu að útskýra af hverju var ekki brugðist fyrr við.

Saksóknarar skoða nú hvort að einhver hafi sýnt af sér glæpsamlega vanrækslu í tengslum við málið eða hvort að viðvörunin hafi verið hunsuð viljandi, svo að hin ábatasama starfsemi í Ischgl gæti haldið áfram óáreitt, enda var hápunktur skíðatímabilsins í gangi er kórónuveirufaraldurinn skall á.

„Þetta lítur ekkert sérstaklega vel út fyrir þá miðað við að þeir fengu nokkuð augljósar viðvaranir sem þeir virðast hafa hunsað,“ er haft eftir Mark Lee, lögfræðingi sem sérhæfir sig í ferðamálum spurður álits af Bloomberg um málið.

„Ég hef séð tímalínuna og mér þykir líklegt að saksóknarar muni sækja einstaklinga til saka fyrir að hafa ekki brugðist nógu hratt við,“ er haft eftir Lee.

Hópmálsóknin fer af stað ákveði saksóknar að ákæra í málinu og lögmaður um 30 Þjóðverja í málinu spyr af hverju yfirvöld hafi ekki gripið til aðgerða þegar viðvörunin kom.

„Af hverju brugðust yfirvöld í Týról ekki strax við um leið og þeir fengu viðvörunina frá Íslandi,“ spyr lögmaðurinn í samtali við Bloomberg.

Neytendasamtökin í Austurríki halda utan um hópmálsóknina og segir Peter Kolba, formaður samtakanna í samtali við Bloomberg að það yfirvöld hafi hunsað viðvaranir sé klár grundvöllur fyrir skaðabætur. Lögreglan hefur skilað inn eitt þúsund blaðsíðna skýrslu um málið sem saksóknarar fara nú yfir. Segir Kolba að næstu skref í hópmálsókninni verði tekin þegar samtökin hafi farið yfir þá skýrslu.