Icelandair verði í skötulíki næsta árið

Stjórnendur Icelandair Group áætla að starfsemi félagsins verði lítil sem engin næstu 12 mánuðina. Félagið ætli sér þó búa þannig um hnútana að það geti tórað í slíku umhverfi í allt að tvö ár og að farþegafjöldi Icelandair verði ekki sá sama og í fyrra fyrr en árið 2024. Þetta er meðal þess sem Markaðurinn segir að hafi komið fram í kynningu forstjóra Icelandair og Kviku Banka með nokkrum af stærstu hluthöfum félagsins á dögunum.

Þessi mynd sem forstjórarnir teikna upp er sögð liggja til grundvallar endurfjármögnun Icelandair Group, en félagið hyggst sækja næstum 30 milljarða króna í hlutafjárútboði sem blásið verður til á næstu vikum. Að sama skapi áætla forstjórarnir að félagið muni ganga á 10 milljónir dala úr sjóðum sínum hvern þann mánuð sem Icelandair Group aflar ekki tekna. Aftur á móti herma heimildir Markaðarins að flugfélagið geti hafið starfsemi að nýju innan mánaðar þegar tækifærin gefast en Bogi Nils Bogason, forstjóri Icelandair Group, hefur lagt ríka áherslu á sveigjanleika félagsins í öllum þeim viðtölum sem hann hefur veitt meðfram kórónuveiruþrengingum Icelandair.

Boeing í vandræðum með að greiða bætur

Vonir standi jafnframt til að félagið geti losnað undan kaupum á sjö Max-vélum, sem eins og kunnugt er hafa verið kyrrsettar í rúmt ár vegna öryggisástæðna, en umræddar vélar hafa ekki enn verið smíðaðar. Morgunblaðið segist hafa heimildir fyrir því að bótagreiðslur Boeing til Icelandair séu í uppnámi enda eigi flugvélaframleiðandinn í mestu vandræðum með að greiða bætur. Boeing sé sjálft í vandræðum og eigi því ekki hægt um vik að reiða fram beinharða peninga. Icelandair hefur þó áður gefið út að félagið hafi náð samkomulagi við Boeing þar sem flugvélaframleiðandinn viðurkennir bótaskyldu, að minnska kosti að hluta, vegna þess tjóns sem vélarnar hafa valdið. Hins vegar hefur aldrei komið fram hvað þýði fyrir sjóði Icelandair.

Þá gerir Morgunblaðið sér jafnframt mat úr nýjasta árshlutareikningi Icelandair, sem sýndi fram á 30 milljarða tap félagsins á árinu, og segir hann gefa til kynna að Icelandair hafi ekki náð að standa við ákvæði í tveimur samningum um langtímafjármögnun félagsins. Vegna stöðunnar sem nú er uppi hafi félagið hins vegar þurft að bókfæra samningana, sem eru á gjalddaga árið 2024, sem skammatímakröfur. Heildarumfang þeirra sé um 93 milljónir dala eða tæplega 14 milljarðar króna.