Þjálfari Saints lét slátrarann sinn heyra það

Síðustu dagar hafa verið erfiðir hjá Sean Payton, þjálfara New Orleans Saints, en lið hans tapaði, 48-46, í ótrúlegum leik gegn San Francisco 49ers um síðustu helgi.

Margir stuðningsmenn Saints eru sárir vegna tapsins og allir hafa sína skoðun í borginni. Því hefur Payton fengið að kynnast.

Hann var að versla í gær og er hann mætti í kjötborðið kom slátrarinn til hans og skammaði hann fyrir umdeilda tveggja stiga tilraun í leiknum. Það fór ekki vel í þjálfarann.

„Ég er að reyna að kaup kjöt en þá byrjar slátrarinn að djöflast í mér út af þessari tveggja stiga tilraun. Ég tjáði honum að steikurnar hans litu ekkert sérstaklega vel út og hann ætti frekar að hafa áhyggjur af þeim en mér. Þetta er að gera mig brjálaðan,“ sagði Payton en hann ku hafa brugðist mjög illa við athugasemdum slátrarans.

Tapið var mjög dýrkeypt fyrir Saints í baráttunni um heimavallarrétt í úrslitakeppninni.