Rausnarlegir bónusar IKEA í Noregi þekkjast ekki á Íslandi

Um þrjú þúsund starfsmenn IKEA í Noregi eiga von á rúmlega hálfri milljón króna í jólabónus þetta árið. Um einkaframtak stjórnenda sænsku húsgagnakeðjunnar er að ræða. Starfsmenn annars vegar, til dæmis á Íslandi, eru ekki verðlaunaðir með sama hætti.

Norski miðillinn The Local greindi frá því í vikunni að starfsmenn IKEA í Noregi væru í jólaskapi enda ættu þeir von á glaðningi í formi jólabónuss.

Yfirmaður hjá IKEA í Noregi tjáir Local að bónusinn nemi allt að 40 þúsund norskum krónum eða rúmlega hálfrar milljónar íslenskra króna. Kostnaður IKEA vegna þessa nemur um 1,6 milljarði króna.

Jólabónusar til starfsmanna IKEA eru árviss viðburður en eru með hæsta móti í ár.

Mbl.is vísaði í frétt norska miðilsins í morgun. Fréttin er ein sú mest lesna á vef miðilsins og velta eflaust einhverjir fyrir sér hvaða glaðningi starfsmenn IKEA á Íslandi eiga von á þetta árið.

Guðný Camilla Aradóttir, yfirmaður samfélagsábyrgðar og samskiptadeildar IKEA á Íslandi, segir ekki hafa tíðkast hér á landi að greiða starfsfólkinu bónus.

„Þetta er vissulega vel gert hjá þeim í Noregi en það er þeirra einkaframtak, ekki samkvæmt tilmælum frá IKEA,“ segir Guðný.

Um 450 manns starfa hjá IKEA, þar af um 320 í fullu starfi að sögn Guðnýjar.

„Undanfarin ár hefur starfsfólk fengið að velja sér jólagjöf úr nokkrum kostum. Í ár voru það þrjár útgáfur af veglegum matarkörfum eða gjafabréf hjá S4S, sem reka fjölda skóverslana.“