Væntanlegur veðurofsi frestar 28 tíma Esjuæfingu John Snorra fyrir K2

Fjallagarpurinn John Snorri Sigurjónsson hefur frestað opinni Esjuæfingu sem hefjast átti í kvöld vegna væntanlegs veðurofsa. Æfingin átti að vera liður í undirbúningi Johns Snorra fyrir ferð hans á K2 sem hann fer í á nýju ári.

John Snorri ætlar að brjóta blað í sögu íslenskrar fjallamennsku með því að verða fyrsti maðurinn í sögunni til þess að klífa fjallið K2 á landamærum Pakistan og Kína að vetri til, næsthæsta tind jarðar. John Snorri ræddi ferðina í Bítinu á Bylgjunni í morgun. Þar var hann spurður af hverju hann vildi ná þessum áfanga enhann hefur nú þegar klifið K2.

„Af því að ég veit að ég get þetta og ég vill sjá íslenska fánann á toppnum á K2 að vetri til. Fyrsti fáninn í heiminum, að hann sé íslenskur. Það er enginn sem getur tekið það í burtu. Hann verður alltaf fyrsti fáninn til að standa á K2 að vetri til,“ sagði John Snorri.

Hingað til hefur enginn klifið K2 að vetri til enda aðstæður afar erfiðar. 

„Það var pólskur hópur, 1987, sem var að reyna við K2 að vetri til. Þeir voru að eiga við 73 gráðu frost og 130 kílómetra vind. Við erum að reikna með að fara í svona aðstæður. Það er verið að sauma á mig svefnpoka sem á að þola 70 gráður,“ sagði John Snorri.

Skásta hitastigið sem von er á -50 til -60 gráður

John Snorri þarf að komast á tindinn fyrir 22. mars en þá lýkur hinu formlega vetrartímabili. Alls áætlar hann að leiðangurinn taki þrjá mánuði. Fyrstu mánuðurnir fari í undirbúningsvinnu á fjallinu og svo mun hópur hans sæta lagi og bíða eftir besta veðrinu til að komast upp.

„Skásta veðrið, kannski -50, -60 gráður og ekki mikill vindur,“ sagði John Snorri um kjöraðstæður auk þess sem hann vonar að fjallið verði ísilagt.

„Mesta hættann er kuldinn og að þurfa að eiga við hann. Ég held að það sé mesta hættan. Svo er alltaf hætta á snjóflóði og grjóthruni. Ég er hins vegar að vonast til þess að það sé lítill snjór í fjallinu. Ég held að það sé miklir vindar að hann festist ekki jafn mikið. Bestu aðstæður eru þær að það verði bara frosið, ísilagt. Það væru kjöraðstæður,“ sagði John Snorri.

Engin Esjuferð í bili

Undirbúningurinn fyrir ferðina er margþættur en meðal þess sem John Snorri hafði áætlað að gera var að labba 14 sinnum upp á Esjuna á 28 tímum. Fyrsta ferðin átti að verða klukkan sex í kvöld en æfingunni hefur nú verið frestað, þar sem spáð er arfavitlausi veðri víðast hvar um landið.

Sagði John Snorri að líklega hefði það verið tilvalið að æfa sig í vonskuveðri en þar sem almenningi hafi verið boðið að koma með sé ekki forsvaranlegt að halda æfinguna.

„Þetta er það besta sem gæti verið til að æfa sig en við erum að bjóða fólki að koma með og þá er ekki sniðugt að bjóða fólki út í gula viðvörun. Þá þarf björgunarsveitina, Esjan yrði öll bláblikkandi,“ sagði John Snorri.

„Það hefði verið mjög gott að fara á Esjuna í dag en við ætlum að fresta því um viku.“