Við stýrið undir áhrifum með þýfi og hníf

Ökumaður sem stöðvaður var í vikunni við hefðbundið eftirlit lögreglunnar á Suðurnesjum á Reykjanesbraut grunaður um fíkniefnaakstur reyndist vera undir áhrifum amfetamíns.

Þá fundust í bílnum nokkrir hvarfakútar og hluti úr bílvél sem taldir eru vera þýfi. Auk þess var maðurinn með hníf í fórum sínum sem var haldlagður.

Fáeinir ökumenn til viðbótar voru líka teknir úr umferð vegna gruns um fíkniefnaakstur að því er segir í tilkynningu frá lögreglunni á Suðurnesjum.

Auk þess var lögreglu tilkynnt um að brotist hefði verið inn í bifreið og þaðan stolið ýmsum munum. Var meðal annars um að ræða mottur, varadekk og þokuljós.