Beckham gaf Brady skó úr geitahárum

Ansi sérstök uppákoma átti sér stað eftir leik New England Patriots og Cleveland Browns í NFL-deildinni í gær.

Þá kom stjarna Cleveland, Odell Beckham Jr., til leikstjórnanda New England Patriots, Tom Brady, og gaf honum skó.

Það sem gerir þessa gjöf sérstaka er sú staðreynd að skórnir eru úr geitahári. Brady er almennt talinn besti leikmaður í sögu deildarinnar eða GOAT eins og það er kallað í Bandaríkjunum.  Honum fannst því við hæfi að gefa honum slíka skó sem voru þó með OBJ áletruninni.

„Hann er miklu meiri „geit“ en ég og á því skilið að fá þessa skó,“ sagði Beckham en hann átti svo langt spjall við Brady inn í göngunum eftir leik.

Beckham lýsti því yfir í síðustu viku að það væri draumur hans að spila með Brady. Leikmannamarkaðurinn lokar á morgun og aldrei að vita hvað gerist.