Efling vísar kjaradeilu við Reykjavíkurborg til ríkissáttasemjara

Stéttarfélagið Efling hefur vísað kjaradeilu félagsins við Reykjavíkurborg til ríkissáttasemjara. Í tilkynningu frá Eflingu segir að Sólveig Anna Jónsdóttir formaður Eflingar hafi sent ríkissáttasemjara skriflega tilkynningu þess efnis síðdegis í gær, 16. september.

Í tilkynningu segir að Efling líti svo á að viðræður við Reykjavíkurborg hafi reynst árangurslausar en þær hafa staðið síðan í febrúar á þessu ári. Kjarasamningurinn sem í hlut á rann út þann 31. mars síðastliðinn.

Þá felur eitt helsta ágreiningsmálið í viðræðunum í sér kröfu um styttingu vinnuvikunnar. „Reykjavíkurborg hefur lýst því yfir að tilraunaverkefni á þessu sviði hafi skilað jákvæðum árangri. Engu að síður hefur ekki náðst viðunandi árangur í samtali þar um milli deiluaðila. Þá hefur Eflingu ekki tekist að koma að ýmsum öðrum þáttum í kröfugerð sinni,“ segir í tilkynningu.

Þá er haft eftir Sólveigu Önnu að öflug, fjölmenn og samhent samninganefnd Eflingar hefði verið sammála um að vísa viðræðum til ríkissáttasemjara.

„Okkur þykir miður að hafa ekki skynjað raunverulegan samningsvilja frá borginni í þessum viðræðum. Með því að vísa vonumst við til að breyta því.“