Trú Ballarin mun hafa á­hrif á stjórnar­hætti WOW Air

Michele Ballarin, stjórnarformaður USAerospace Associates LLC, segir að búið sé að greiða helming kaupverðs fyrir búnað úr þrotabúi WOW air. Hinn helmingurinn verði greiddur í næstu viku þegar tæknideild USAeurospace verður búin að staðfesta að allur búnaðurinn sé í lagi. 

Þetta segir Ballarin sem ræddi við fréttastofu að loknum blaðamannafundi á Grillinu á Hótel Sögu í dag. Hún vildi ekki upplýsa um kaupverðið. 

Jómfrúrrflug í október

Áætlað er að jómfrúrrflug nýs WOW Air verði flogið í október frá Washington DC í Bandaríkjunum til Dallas, þaðan til Keflavíkur og svo aftur til Washington.

Stefnt er á að bjóða upp á flug frá Íslandi til meginlands Evrópu og Bandaríkjanna. Ballarin segir dagleg flug verða á milli Keflavíkur og Washington. Tvær flugvélar verði í notkun flugfélagsins fyrst um sinn og fjöldi flugvéla muni svo aukast í samræmi við eftirspurn.

Þá segist Ballarin gera ráð fyrir því að flugfélagið muni fljúga með tíu til tólf flugvélar þegar starfsemin verði komin á flug. Búast megi við að eftirspurn eftir lággjalda flugferðum verði mikil. Sætanýting í WOW air hafi verið 93 prósent sem sé mjög hátt hlutfall.

Fylgja þurfi eftirspurn og fari fjöldi véla eftir henni. Félagið geri ráð fyrir á milli tíu og tuttugu vélum. Sá fjöldi véla muni líklegast nást um miðbik næsta árs.

Útlit WOW Air mun ekki koma til með að breytast

Ballarin segir að fylgja þurfi óskum Íslendinga um það hvert verði flogið. Mikil eftirspurn sé eftir flugferðum til Bretlands en auk þess verði flogið til allra helstu höfuðborga Evrópu; Parísar, Lundúna, Berlínar og Rómar svo einhverjar séu nefndar.

Flogið verður til nokkurra staða í Bandaríkjunum. Ballarin segir áhersluna vera lagða á austurströnd landsins fyrst um sinn. Flogið verði svo innan Bandaríkjanna á „öðru stigi“ félagsins eins og Ballarin orðar það.

Ekki stendur til að breyta neinu er kemur að útlitinu. Notast verður við sömu búningana og sama nafn. Ballarin segir það hafa verið gert á réttan hátt í fyrra skiptið og að fólk sakni fjólubláa litarins á Keflavíkurflugvelli.

Hún segist ekki hafa áhyggjur vegna orðsporsins sem WOW Air hefur. Viðskipti séu alltaf erfið og flókin, sama á hvaða sviði þau séu og hlutir gerist í fyrirtækjum sem ekki er hægt að hafa stjórn á.

„Það er margt gott við WOW, þar á meðal hvernig félaginu var stjórnað, upplifunin í hverju flugi, áfangastaðirnir, litirnir og hönnunin á flugvélunum. Ég held ekki að breyta eigi miklu og nafnið er nafnið, þetta er frábært nafn. Við viljum byggja ofan á það og færa WOW Air mikla velgengni,“ segir Ballarin.

WOW Air setustofa í Leifsstöð fyrir alla farþega

Til stendur að hefja miðasölu í næstu viku. Heimasíðan verði vonandi komin í loftið og nothæf svo fólk geti byrjað að bóka flug. WOW air muni bæði notast við Airbus og Boeing vélar.

Unnið verður eftir svipuðu módeli og WOW hið gamla gerði. Lögð verður áhersla á að flugin verði enn lággjalda og segir Ballarin að engin ástæða sé til að rukka farþega of mikið fyrir það eitt að fljúga. Fólk eigi að geta flogið oft og ekki eiga að þurfa að skipuleggja ferðalög í langan tíma.

Þrátt fyrir að litlar breytingar verði á WOW Air standa til breytingar á vegum félagsins á Keflavíkurflugvelli. Ballarin segist vilja geta haft setustofu fyrir alla farþega WOW á Keflavíkurflugvelli svipaðar þeim sem farþegar á fyrstu farrýmum fá jafnan aðgang að. Viðræður við Isavia séu þegar hafnar varðandi þetta.

Þá verði matur og drykkir um borð gjaldfrjáls og sé það einn liður í því að gera flug skemmtileg á ný.

WOW Air alþjóðleg flugfélag

Ballarin segir WOW verða alþjóðlegt flugfélag. Til standi að félagið hafi flugrekstrarleyfi frá bæði bandarískum- og íslenskum yfirvöldum.

Þá verði félagið með skrifstofur bæði hér á landi og vestanhafs. Ballarin minnir á að félagið sem hafi keypt eignirnar úr þrotabúi WOW air sé íslenskt. Hafi það verið sérstaklega gert til að halda íslenskum anda í fyrirtækinu.

Verið sé að setja saman teymi sem mun fara með stjórn fyrirtækisins hér á Íslandi og mun það verða tilkynnt fljótlega hverjir verði í þeim hópi. Ballarin nefnir þó að fólkið sem komið sé í hópinn kunni sitt fag og sé ákaft í að sjá fyrirtækinu ganga vel.

Stór hluti starfseminnar verður vöruflutningur. Ballarin segist vilja flytja íslenskar vörur vestur um haf þar sem mikið sé um vandaðar vörur héðan, bæði matvörur og svo til dæmis snyrtivörur. Staðsetning Íslands bjóði upp á mikinn vöruflutning á milli heimsálfa.

Tvær flugvélar á vegum WOW verði sérstakar vöruflutningavélar.

„Þær bíða eftir að geta komið og sótt fisk núna,“ segir Ballarin. Þá segir hún að vilji sé fyrir því að flytja íslenskan fisk og annað sjávarfang til Bandaríkjanna

Trúin mun hafa áhrif á starfsemi flugfélagsins

Trúarleg gildi eru í hávegum höfð hjá Ballarin sem er dyggur stuðningsmaður Donald Trump Bandaríkjaforseta.

„Við trúum öll á eitthvað og það skiptir okkur máli, við getum kallað það trú eða almannaheill. Það snýst allt um sanngirni er það ekki? Það snýst um að gera hið rétta og að þjóna öðrum vel,“ segir Ballarin.

Hún segir að trú hennar muni hafa áhrif á starfsemi flugfélagsins bæði þegar það kemur að starfseminni og hvernig komið verði fram við farþega. Þá skipti mestu máli að vera sanngjarn.

Trúin muni ekki vera augljóslega sýnileg út á við en hafa gríðarleg áhrif á heimspeki- og stefnu fyrirtækisins og hvernig fyrirtækið mun starfa.