Taldi ekki ástæðu til að stöðva tímabundið áform Johnson

Skoskur dómari hefur hafnað beiðni um að stöðva tímabundið áform Boris Johnson að fresta breska þinginu.  Úrskurður þess efnis var kveðinn upp í dómsal í morgun. BBC greinir frá.

Ákvörðun Johnson sem staðfest var af Bretlandsdrottningu hefur valdið miklu uppnámi í Bretlandi. Hópur 75 þingmanna gerði þá kröfu um að fá úr því skorið hvort þingfrestun Johnson sé lögleg. Vildu þingmennirnir að frestunin yrði stöðvuð tímabundið á meðan málið væri til meðferðar fyrir dómstólnum.

Dómarinn taldi ekki sannfærandi rök fyrir því að grípa inn í ákvörðun forsætisráðherra. Dómarinn samþykkti hins vegar að taka málið fyrir í heild sinni fyrr en til stóð. Á þriðjudaginn í stað næsta föstudags.

Dómarinn sagði það hagsmuni almennings og réttarins að málið fengi meðferð fyrr en síðar.