Má ekki mæta á æfingasvæðið á meðan hann tekur út leikbann

Það er engin miskunn hjá NFL-deildinni í máli hlauparans Kareem Hunt hjá Cleveland Browns en hann byrjar leiktíðina í átta leikja banni.

Frá og með laugardeginum verður Hunt meinað að mæta á æfingasvæði félagsins. Hann verður í því banni fram í nóvember. Á laugardaginn þurfa félögin að tilkynna 53 manna hóp vetrarins.

Browns reyndi að fá þessari ákvörðun hnekkt á þeim forsendum að Hunt veitti ekki af stuðningnum. NFL-deildin lét þá ástæðu sem vind um eyru þjóta.

Hunt fékk þetta langa bann fyrir tvö brot utan vallar. Hið alvarlegra var er hann ýtti og sparkaði í konu. Það mál kostaði hann starfið hjá Kansas City Chiefs.