Björn Ingi reisti eigið bænahús við Akrafjall

Björn Ingi Hrafnsson hefur reist bænahús á jörð fjölskyldunnar í Hvalfirði undir Akrafjalli. Í framtíðinni hyggst Björn Ingi búa á jörðinni. Er alinn upp á trúuðu heimili og segir eigið bænahús hafa lengi verið draum móður sinnar.

„Ég kem frá mjög trúuðu heimili, þar sem bænir og andans mál hafa alltaf verið sjálfsagður hluti af daglegu lífi,“ segir Björn Ingi Hrafnsson sem nýlega reisti lítið bænahús. „Ég hef reynt að tileinka mér mátt bænarinnar sjálfur á fullorðinsárum og sífellt meira.“

Bænahúsið stendur á jörðinni Másstöðum undir Akrafjalli sem Björn Ingi og foreldrar hans hafa byggt upp á undanförnum árum. Hann segir að staðurinn sé orðinn mikill griðastaður fjölskyldunnar.

„Þarna ætla ég að búa í framtíðinni, enda er einstakt að geta verið í jafn miklu návígi við náttúruna í algjörum friði frá þéttbýlinu, en samt aðeins spölkorn frá bæði Akranesi og sjálfri höfuðborginni.“

Björn Ingi segir húsið „athvarf þar sem hægt er að eiga kyrrðarstund með sjálfum sér og öðrum, hugleiða og biðja og rækta andann“.

Hugmyndin að bænahúsinu kom frá móður Björns Inga. Hún hafði lengi átt þennan draum og ungur ákvað hann að láta drauminn rætast. Fyrir nokkrum árum sá hann auglýsingu um nýtt smáhýsi á Bland en það var smíðað í hesthúsahverfinu í Kópavogi. Hann keypti hýsið en fyrst núna gafst tækifæri til að koma því fyrir og innrétta í samræmi við erindið.

Björn Ingi segir yndislegt að taka þátt í þessu með foreldrum sínum og finna viðbrögðin frá fólki sem fylgst hefur með uppbyggingunni á samfélagsmiðlum. „Við vitum af mörgum fleirum sem ætla að gera slíkt hið sama og eiga sitt eigið bænahús, hvort sem er í sveitinni eða við sumarbústaði,“ segir hann.

Nú þegar bænahúsið er fullgert stendur til að vígja það með formlegum hætti og mun prestur mæta til verksins á næstu dögum.

„Mér finnst mikilvægt að tala opinskátt um trúna og vera stoltur af því að trúa á bænina og mátt hennar,“ segir Björn Ingi. „Það hefur kannski ekki verið mikið í tísku til skamms tíma, en ég held að það sé svolítið að breytast aftur. Áherslan á núvitund, íhugun og margvíslega hugleiðslu er auðvitað eitthvað sem bænin smellpassar inn í og við erum öll í amstri hversdagsins að leita að einhverjum innri friði og ró.“