Bogi Ágústsson blómstrar í hlutverki andahirðis: „Kjánaprik, við ætlum að fara þessa leiðina“

Bogi Ágústsson, fréttaþulur og fréttamaður á RÚV, lenti í miklu ævintýri í hjólatúr í miðborginni í dag því hann fann sig knúinn til að leggja lykkju á leið sína til að smala andafjölskyldu einni að Reykjavíkurtjörn.

Bogi reiddi hjólið sitt á meðan hann smalaði öndunum og ræddi við þær. Ferðalagið hófst á höfninni og þaðan var haldið yfir Mýrargötu, Tryggvagötu, um Pósthússtrætið, Kirkjutorg og Templarasund og endaði á áfangastaðnum Reykjavíkurtjörn hvar andamamma og ungarnir þrír kvöddu Boga með sundspretti.

Bogi leiddi andafjölskylduna með umhyggju en um leið af mikilli festu. Þegar hún gerði sig líklega til að villast af leið þá greip Bogi samstundis í taumana: „Kjánaprik, við ætlum að fara þessa leiðina“.

Bogi birti myndband af ferðalagi hinna fimm fræknu á Facebook-síðu sinni síðdegis en eins og sönnum fréttamanni sæmir fylgdi myndbandinu að sjálfsögðu nákvæm atvikalýsing á ferðalaginu eins og því vatt fram.