Innipúkinn haldinn úti á Granda í ár

Innipúkinn hefur verið haldinn í hátt í tuttugu ár um verslunarmannahelgina, alltaf í Reykjavík og alltaf innandyra. Við höfum þó síðustu ár haft smá breytingu á og verið með hluta hátíðarsvæðisins utandyra. Síðustu sex ár hefur hátíð farið fram í Naustinu, á tónleikastöðunum Húrra og Gauknum,“ segir Ásgeir Guðmundsson, framkvæmdastjóri Innipúkans, inntur eftir ástæðu þess að Innipúkinn færi sig um set.

Fyrir stuttu urðu eigendaskipti á Húrra og var ákveðið að fara í aðra átt með rekstrarfyrirkomulag staðarins, svo hann hentaði ekki fyrir hátíð sem þessa, að sögn Ásgeirs.

„Við fórum þá að gera ráð fyrir því að færa okkur um set en þetta er kannski dæmi um hve þrengt er að stöðum fyrir lifandi tónlist í Reykjavík, sem verður að teljast sorglegt, enda ein okkar helsta útflutningsvara. Hátíðin var hér áður í Iðnó og síðan á Faktorý, en sá staður var rifinn fyrir nýtt hótel.“

Hann segir upp vera komna alvarlega stöðu fyrir tónlistarfólk og tónleikahaldara.

„Í ljósi þessara upplýsinga fórum við að velta fyrir okkur hvar væri gaman að halda Innipúkann og upp kom sú hugmynd að færa hátíðarsvæðið úr miðbænum og út á Granda. Í raun fannst okkur það líka gott og hollt fyrir hátíðina að færa sig reglulega, fái tækifæri til að enduruppbyggja sig á nýjum stöðum og halda sér ferskri.“

Ásgeir segir að Grandinn sé auðvitað í mikilli uppbyggingu hvað varðar veitingar og menningu, en sé einnig nálægt miðsvæðinu. Því hafi legið vel við að skoða þá staðsetningu betur.

„Bryggjan Brugghús hefur verið leiðandi afl á svæðinu í tónleikahaldi og fyrir menningartengda viðburði. Ég kom að hluta til að stofnun Bryggjunnar ásamt fleirum en reri á önnur mið núna fyrr á árinu. Ég steig þá til hliðar og hef einbeitt mér að öðrum verkefnum. Núna er ég í mjög takmörkuðu hlutverki þar en veiti samt ráðgjöf inn á milli ásamt því að halda utan um Sunnudjassinn,“ segir Ásgeir.

Hann segir lifandi tónleika hafa verið á staðnum hverja einustu viku nánast óslitið frá opnun. Hann segir stærð staðarins hafa orsakað að tónlistarfólk hafi strax byrjað að hringja í kjölfar þess að opnað var.

„Núna á tónlistarfólk sér ekki marga samastaði, ef mætti taka þannig til orðs. Þannig að mér finnst eigendur staðarins eiga hrós skilið fyrir þátttöku sína, því svona tónleikahald er gert meira af hugsjón en í gróðaskyni.“

Hann segir þá sem standa að baki Innipúkanum alltaf hafa viljað hafa tvö svið, sem flækti málið nokkuð.

„Við vildum hafa dagskrána fjölbreytta, viljum helst að rúmlega tuttugu listamenn nái að koma fram en höfum bara þrjú kvöld. Við ákváðum þá að hafa samband við Jón Mýrdal eiganda fiskveitingastaðarins Messans við Höfnina, en hann liggur við hlið Bryggjunnar Brugghúss.“

Jón rak áður Húrra en seldi staðinn og fór í veitingabransann. Ásgeir segir Jón uppátækjasaman og greiðvikinn og að hann hafi einnig saknað smá tónleikahaldsins sem einkenndi Húrra þegar hann var í hans eigu.

„Þegar ég ber hugmyndina undir hann, að byggja svið inni á staðnum, þá stekkur Jón strax á tækifærið. Hann var spenntur að fá að taka aftur þátt í að halda Innipúkann, líkt og hann gerði þegar hann var með Húrra.“

Ásgeir segir að það þurfi nokkuð viðamiklar breytingar á Messanum til að hann geti rýmt tónleikana og það sé allt gert í góðu samstarfi.

„Hann lítur bara á það sem verkefni sem þarf að leysa og það verður gaman að vinna það með honum og Elvari á Bryggjunni. Útisvæði Innipúkans, eins þversagnakennd setning og það er, verður enn flottara í ár. Áður vorum við með torfþökur og smá sveitaþema, það mun víkja fyrir meira hafnarstemningu. Þetta verður allt gert í góðu samstarfi við Reykjavíkurborg og Höfnina,“ segir Ásgeir að lokum.

Miðasala á Innipúkann hefst síðar í mánuðinum, nákvæm tímasetning verður tilkynnt síðar og segir Ásgeir að miðaverði verði stillt í hóf. Á útisvæðinu verður einnig dagskrá, myndlistarmarkaður í samstarfi við nemendur LHÍ, fatamarkaður og tónlist, og er sá hluti Innipúkans opinn öllum.