Segja hugmyndina um nýtt flugfélag sem "treður á launafólki“ vonda hugmynd

Alþýðusamband Íslands er allt annað en ánægt með hugmyndir Skúla Mogensen um hvernig nýtt lággjaldaflugfélag á grunni WOW Air þyrfti að líta út til að ná árangri. Skúli hélt í gær fyrirlestur á frumkvöðlaráðstefnunni Startup Iceland 2019 í Hörpu þar sem hann ræddi um sögu flugfélagsins og hugsanlega endurreisn.

Sjá nánar: Skúli virðist staðráðinn í því að endurreisa WOW Air

Skúli sagði í gær að nauðsynlegt væri fyrir nýtt flugfélag að geta ráðið starfskrafta erlendis frá.

„Þetta er viðkvæmt og verður líklega í fyrirsögnunum á morgun: Skúli segir engin stéttarfélög,“ sagði Skúli sem virtist gera sér grein fyrir því að hann væri með orðum sínum að hætta sér út á hálan ís. Hann bætti við að þetta væri lykilatriði. Ísland væri einfaldlega orðið of dýrt og íslensk flugfélög væru ekki samkeppnishæf.

„Eina leiðin til þess að fá þetta til að virka er að vera með réttu blönduna. Við þurfum að vera með blöndu af áhöfnum, flugmönnum og tölvudeild. Sumt af starfsfólkinu á Íslandi, sumt erlendis,“ sagði Skúli.

Í pistli sem ASÍ birti á Facebook-síðu sinni undir yfirskriftinni „NEI TAKK, Skúli Mogensen“ er Skúli harðlega gagnrýndur fyrir fyrirætlanir sínar. Hugmyndin um nýtt lággjaldaflugfélag sem skapi sér samkeppnisforskot með því að „troða á launafólki“ sé einfaldlega vond hugmynd sem íslensk verkalýðshreyfing gæti aldrei samþykkt.

Fyrirtæki sem spila ekki eftir leikreglum ekki velkomin

„Skúli Mogensen lýsti því í kvöldfréttum RÚV í gær að kjarasamningsbundin laun og leikreglur á íslenskum vinnumarkaði hafi verið of íþyngjandi fyrir rekstur flugfélagsins WOW. Þetta eru afar kaldar kveðjur þar sem WOW naut velvildar starfsmanna sinna og í raun samfélagsins alls,“ segir í færslunni.



Það hafi ekki verið mannsæmandi laun sem settu fyrirtækið í þrot.

„Að koma núna og kenna starfsmönnum og launakjörum þeirra um gjaldþrotið er allt annað en stórmannlegt og kaldar kveðjur til starfsfólksins sem stóð með félaginu þar til yfir lauk.“

Lög, reglur og kjarasamningar séu undirstaða norræns velferðarsamfélags.

„Fyrirtæki sem eru tilbúin að starfa á þessum forsendum eru velkomin – önnur ekki. Þeir sem ætla að vera með í leiknum verða að spila eftir reglunum. Hinum sem ætla að svindla er mætt af fullri hörku“.