Fór í skipti­nám, var í tvö­földu tón­listar­námi og dúxaði

„Ég er búin að vera í tvöföldu tónlistarnámi með skóla, spila á fiðlu og læri klassískan söng í tónlistarskólanum á Egilsstöðum,“ segir Héraðsbúinn Rán Finnsdóttir sem gerði sér lítið fyrir og var dúx Menntaskólans á Egilsstöðum vorið 2019.

Rán segir skólagönguna alla tíð gengið vel og segist í raun hafa búist við því að nafn hennar yrði kallað upp þegar tilkynnt væri um dúx ME á útskriftarathöfninni 25. maí síðastliðinn. Tuttugu og átta nemendur útskrifuðust úr Menntaskólanum á Egilsstöðum í vor.

„Mamma og pabbi voru alveg himinlifandi en þau bjuggust alveg eins við þessu og ég,“ segir Rán sem útskrifaðist með einkunnina 9,7. Menntaskólaganga Ránar var ekki eins og hjá flestum en á öðru ári fluttist Rán búferlum til borgarinnar Valencia á austurströnd Spánar og var þar skiptinemi veturinn 2016-2017.

Rán er á því að skiptinámið hafi kennt henni margt, „Skiptinámið kenndi mér mjög margt, verandi skiptinemi lærir maður einhvern veginn meira um samskipti og hvernig hægt er að tala við hvern sem er, sama hvað,“ segir Rán og bætir því við að hún eigi enn í samskiptum við vini sína frá Spáni.

Raungreinarnar voru Ránar ær og kýr, greint var frá því á athöfninni að í 19 af 21 raungreinaáföngum hafi Rán fengið 10 í einkunn, fyrir árangurinn í raungreinum hlaut Rán Raungreinaverðlaun Háskólans í Reykjavík, þau verðlaun nýtast henni þó ekki enda hefur hún sótt um nám í Verkfræðilegri Eðlisfræði við Háskóla Íslands.

Rán segist læra best á því að kenna öðrum í kringum hana og hjálpa þeim sem eru í sömu áföngum, „þannig lærir maður og skilur betur,“ segir Rán Finnsdóttir, dúx Menntaskólans á Egilsstöðum vorið 2019.