Þykir bensín­stöðva­fækkunin brött

Þrátt fyrir að hafa vitað af stefnu borgarinnar um nokkurt skeið segir forstjóri Olís að fréttir gærdagsins, um að til standi að fækka bensínstöðvum í Reykjavík um helming fyrir árið 2025, hafi komið sér nokkuð á óvart. Honum þyki fækkunin nokkuð brött, en fulltrúi borgarinnar segir að í upphafi verið lögð áhersla á fækkun stöðva í íbúðabyggð.

Dagur B. Eggertsson borgarstjóri tilkynnti í gær að borgarráð hefði samþykkt að fækka bensínstöðvum í Reykjavík um helming fyrir árið 2025 eða innan sex ára. Þær hlaupa í dag á tugum og er ætlunin að nýta lóðir bensínstöðvanna með öðrum hætti, t.a.m. undir íbúðir eða aðrar verslanir.

Jón Ólafur Halldórsson, forstjóri Olís, segir að borgin hafi boðað til fundar um þessi mál í janúar síðastliðnum. Þar hafi umræðan hins vegar verið á þeim nótum að um væri að ræða þróunina næstu áratugi. „Það var kannski ekki talað við okkur á þeim tíma að um væri að ræða fimm til sex ár. Mér finnst þetta því koma mjög bratt,“ segir Jón Ólafur.

Hann segist að sama skapi velta fyrir sér hvort borgin sé að huga nógu vel að hagsmunum borgarbúa í þessum efnum. „Við erum bílaþjóð og það er gert mikið úr hlut einkabílsins í loftslagsmálunum, sem að mínu viti er full bratt. Ég viðurkenni það; þó svo að við séum öll á sama báti með loftslagsmálin þá finnst mér þetta líka snúast um þjónustustig við borgarbúa og hvað eigi þá að taka við ef það verður ekki áfram greitt aðgengi að eldsneyti.“

Jón Ólafur segir þau hjá Olís engu að síður vera fyllilega tilbúin að taka þátt í fyrirhuguðum orkuskiptum í samgöngum.

„Við fylgjumst að sjálfsögðu með því sem er að gerast á þessum markaði og erum tilbúin til viðræðna um þetta. Ég tel engu að síður að það hefði verið hyggilegra að að fara hægar í þessu máli,“ segir Jón Ólafur sem bíður spenntur eftir frekari samræðum við borgina um sýn hennar á þessi mál.

Fjölorkustöðvar við stofnbrautir

Sigurborg Ósk Haraldsdóttir, formaður skipulags- og samgönguráðs borgarinnar, segir að fækkunarhugmyndin sé og verði unnin í samráði við olíufélögin. Þannig hafi borgin lagt fram hvata fyrir félögin til að fækka stöðvunum. Geri þau það innan tveggja ára muni Reykjavíkurborg fella niður gjöld á móti.

Nýta megi reitina sem losna undir íbúðir eða verslanir, það ráðist af hverri lóð fyrir sig hvaða nýting er talin henta best á hverjum stað.

Hugmyndin sé að fækka fyrst þeim bensínstöðvum sem eru með styrktan lóðaleigusamning og þær sem eru inni í íbúðahverfum - „þ.e.a.s. að þær sem eru í þéttri íbúðabyggð verða fyrsta til að fara.“ Þær sem eru staðsettar við stofnbrautir verði þannig síðastar til að fara.

Hún segist vona að hægt verði að gera þær stöðvar sem eftir verða að „fjölorkustöðvum,“ þar sem vegfarendur munu geta nálgast margvíslegt eldneyti; eins og rafmagn, metan og vetni.