Gísli stóð nakinn á bíla­stæði í Kaup­manna­höfn á meðan al­menningur hjólaði fram­hjá

Gísli Örn Garðarsson, leikari og leikstjóri, var gestur í Bítinu á Bylgjunni í morgun þar sem hann fór um víðan völl í skemmtilegu spjalli. Nú hafa hundrað þúsund manns séð Ellý í Borgarleikhúsinu en Gísli er leikstjóri verksins.

„Það er alveg magnað og þetta eru nánast óraunverulegar tölur. Hvaðan kemur allt þetta fólk?,“ segir Gísli Örn og bætir við að hann hafi heyrt sögu af manni sem ætlar sér að sjá verkið tíu sinnum. Nú þegar væri hann búinn að fara sjö sinnum.

„Ég held að þetta sé fyrir mörgun eins og að setjast inn í einhverskonar tímavél. Þú ferð í ákveðið ferðalag og það er einhver nostalgía í þessu. Svo er þetta að einhverju leyti saga okkar allra. Við erum öll alinn upp við þessa tónlist. Ellý var fyrsta konan sem fær atvinnu af því að syngja dægurlög,“ segir Gísli sem segir að Ellý hafi verið algjör brautryðjandi á sínu sviði.

Ætlaði fyrst að setja upp sýningu um Villa

Hann segist upphaflega hafa ætlað sér að gera sýningu um Vilhjálm Vilhjálmsson en þegar hann áttaði sig á því að hann vissi nánast ekkert um Ellý Vilhjálms kom ekkert annað til greina. Því næst varð að finna Ellý hér á landi og upphaflega átti að gera sjónvarpsþáttinn Leitin að Ellý hér á landi.

„Svo frétti ég af því að það væri ung leikkona að flytja verkefni í leiklistarskólanum þar sem hún söng lög Ellýjar í 20-25 mínútna verki. Þegar ég sá hana fyrst hringdi ég strax upp í sjónvarp og sagði að við þyrftum að hætta við þennan sjónvarpsþátt. Ellý er fundin,“ segir Gísli og á það við Katrínu Halldóru Sigurðardóttur sem einmitt hefur slegið í gegn í verkinu í Borgarleikhúsinu.

„Svo vissi ég ekkert hvort hún gæti leikið og vissi í raun ekkert um hana. Ég réði hana í Hróa Hött þegar ég gerði Hróa Hött í Þjóðleikhúsinu, svo í Óþelló og ég réði hana í sýningar til að athuga hvernig okkur myndi ganga að vinna saman. Hún var í rosalega langri prufu án þess að vita af því. Þarna var dóttir mín líka í Hróa Hetti og einn daginn segi ég við hana við eldhúsborðið að ég ætli nú að fara ræða við Katrínu og bjóða henni hlutverkið. Þá var hún fyrri til og hljóp til hennar daginn eftir og sagði, pabbi ætlar að biðja þig um að leika Ellý.“

Gísli segir að Vesturport sé að fara út með sýninguna Hrói Höttur til Hong Kong.

„Við verður þar opnunarsýning stærstu fjölskylduhátíðar Kínverja í Hong Kong og það með rennibrautasviðið með okkur. Sýningin hefur farið út um allan heim og menn fá því veður af þessu og þannig endum við í Hong Kong,“ segir Gísli sem mun á næstunni taka þátt í sýningu í Borgarleikhúsinu sem heitir Ég hleyp og mun hann sjálfur hlaupa 10-12 kílómetra í hverri sýningu en Gísli segist aftur á móti hata að hlaupa. Gísli er núna að leika í þáttum sem var sýndir á Netflix eftir danskan handritshöfund sem heitir Adam Price. Þættirnir eru teknir upp í Danmörku og Noregi og bera heitir Ragnarok.

Mjög vandræðalegt

„Hann skrifaði Borgen og er einn af þeim flottustu í Danmörku. Ég hef verið að hlaupa mikið í fjöllunum í Noregi í þessari seríu, fáklæddur, mjög fáklæddur. Þrír dagar í síðustu viku voru þannig að ég var alveg nakinn. Þetta er mjög sérstakt og ég hef í rauninni aldrei verið svona allsber. Þetta moment þegar þú ert með fimmtíu manna starfslið fyrir framan þig og þú þarft að fara úr nærbuxunum. Það er svo vandræðalegt. Svo er náttúrulega ískalt og það hefur áhrif á allan líkamann,“ segir Gísli sem leikur mann sem í rauninni á allt í viðskiptalífinu í litlum bæ í Noregi sem heitir Edda.

Hann segir að þættirnir komi út árið 2020 og eru teknir upp bæði í Noregi og í Kaupmannahöfn.

„Talandi um að vera nakinn. Ég stóð einmitt á bílastæði úti í Köben núna á miðvikudaginn nakinn uppi á palli í tökum. Það var mikið af hljólreiðafólki að hjóla þarna framhjá og fullt af fólki í göngutúr.“

Hér að neðan má hlusta á viðtalið.