Meistararnir komnir í undanúrslit Vesturdeildarinnar

Ríkjandi NBA meistarar Golden State Warriors tryggðu sér farseðil í undanúrslit Vesturdeildarinnar í nótt þegar þeir unnu öruggan nítján stiga sigur á Los Angeles Clippers, 110-129.

Warriors vann þar með einvígið 4-2 og mun mæta Houston Rockets í undanúrslitum.

Kevin Durant fór mikinn í nótt og skoraði 50 stig. Draymond Green átti sömuleiðis góðan leik með 16 stig, 10 stoðsendingar og 14 fráköst. 

Ítalinn Danilo Gallinari var atkvæðamestur í liði Clippers með 29 stig en liðið heldur nú í sumarfrí eftir hetjulega baráttu við meistaraliðið.