Vann skemmdarverk á lögreglustöðinni

Lögreglan á höfuðborgarsvæðinu handtók mann í annarlegu ástandi á tólfta tímanum í gærkvöldi í porti lögreglustöðvarinnar við Hverfisgötu. Maðurinn hafði brotið þar tvær rúður og var vistaður í fangageymslu.

Á sjöunda tímanum í gær var lögreglu tilkynnt um mann í annarlegu ástandi sem sveiflaði golfkylfu í miðbænum. Maðurinn var handtekinn og vistaður í fangageymslu.

Á ellefta tímanum var lögreglu tilkynnt um innbrot í bifreið í miðborginni. Þar var stolið bakpoka með fartölvu, vegabréfi og fleiri munum.

Þá voru þrír ökumenn stöðvaðir á höfuðborgarsvæðinu vegna gruns um akstur undir áhrifum vímuefna. Einn ökumannanna er auk þess grunaður um ítrekaðan akstur sviptur ökuréttindum.