Mikil pressa á þeim sem vilja kaupa rekstrar­hluta WOW úr þrota­búinu

Skiptastjóri þrotabús WOW air segir mikinn þrýsting vera á þeim sem vilja kaupa rekstrarhlutann úr búinu og að úrslitin gætu skýrst í dag. Pressan komi frá leigusölum flugvélanna sem sjái sér hag í því að þær verði áfram notaðar með sama útliti. Þá séu þeir sem úthluti svokölluðum slottum sem WOW air átti að verða óþolinmóðir að selja þau annað.

 

Líkt og fjallað hefur verið um í fjölmiðlum að undanförnu hyggjast Skúli Mogensen og helstu lykilstarfsmenn WOW air endurvekja rekstur flugfélagsins. Eru þeir sagðir leita fjármögnunar upp á 40 milljónir dala til þess að fara af stað með reksturinn.  

Sveinn Andri Sveinsson, skiptastjóri þrotabús WOW air, staðfestir að einhverjir aðilar hafi haft samband og lýst yfir áhuga á að kaupa rekstarhlutann út búinu. Hann segir að tímaramminn sé ansi þröngur.

„Við skiptastjórarnir erum alveg rólegir þannig lagað. Við höfum tekið mönnum fagnandi og myndum fagna því ef kæmi fé inn í búið fyrir verðmæti,“ segir Sveinn Andri.

Af hverju þarf að hraða þessum ákvörðunum?

„Það eru fyrst og fremst tveir aðilar. Það er Samgöngustofa sem getur ekki haldið þessu leyfi hangandi. Auk þess sem þessi slott eða leiðir, það þarf að koma þeim aftur í umferð. Þessir stjórnendur úti sem sjá um að úthluta slottum, þeir eru ekki mjög þolinmóðir. Síðan eru þetta aðallega leigusalar flugvélanna sem sjá sér ákveðinn hag í því að nýr aðili taki yfir vélunum sem eru með sama útliti og lógó því þá þarf ekki að fara út í mikinn kostað við að breyta vélunum. Ég hefði bara haldið að það væri dagurinn í dag en það má vel vera að þeim takist að kreista út einhverja auka fresti en það erum ekki við sem ráðum ferðinni þar.“

Greint var frá því í Fréttablaðinu í dag að tilraun Skúla Mogensen til þess að endurreisa WOW air byggist meðal annars á því að umtalsverðum fjárhæðum, eða allt að 670 milljónum íslenskra króna, verði safnað á erlendum hópfjármögnunarvettvangi, ekki ólíkt hinu íslenska Karolina Fund.

Þá kemur fram að sú hugmynd sé uppi að Skúli og þeir lykilstarfsmenn sem taka þátt í endurreisninni taki yfir kröfur um 200 starfsmanna um vangoldin laun og fyrirgeri þar með rétti sínum til launa í uppsagnafresti. Sveinn Andri staðfestir að sú hugmynd hafi verið borin upp.

„Ef nýr rekstraraðili tekur yfir rekstur WOW og ræður til sín fyrrum starfsmenn félagsins þá er það fagnaðarefni að fólk sé að fá vinnu en þetta myndi líka leiða til þess að það fækki forgangskröfur í búið sem þessu nemur og þá eru meiri líkur á því að almennir kröfuhafa, sem við vinnum fyrir líka, fái eitthvað fyrir sinn snúð.“