Lakers ekki í úrslitakeppnina sjötta árið í röð | Myndbönd

Sjötta árið í röð kemst Los Angeles Lakers ekki í úrslitakeppni NBA-deildarinnar. Þetta var endanlega ljóst eftir tap liðsins fyrir Brooklyn Nets, 106-111, í nótt.

Lakers landaði LeBron James í sumar og um jólin var liðið í 4. sæti Vesturdeildarinnar. Eftir að LeBron meiddist fór að halla undan fæti og gengið eftir áramót hefur verið slakt.

LeBron skoraði 22 stig í leiknum í nótt, tók níu fráköst og gaf 14 stoðsendingar. JaVale McGee skoraði 33 stig og tók 20 fráköst hjá Lakers. Joe Harris var stigahæstur í liði Brooklyn með 26 stig.

James Harden skoraði 61 stig þegar Houston Rockets bar sigurorð af San Antonio Spurs, 111-105. Harden hitti úr níu af 13 þriggja stiga skotum sínum í leiknum og gerði varnarmönnum San Antonio lífið leitt. Houston er í 3. sæti Vesturdeildarinnar en San Antonio í því áttunda.

Oklahoma City Thunder komst aftur á sigurbraut þegar liðið vann Toronto Raptors, 109-116, á útivelli. Paul George skoraði 28 stig fyrir Oklahoma sem er í 5. sæti Vesturdeildarinnar. Russell Westbrook var með þrefalda tvennu í liði Oklahoma; 18 stig, tólf fráköst og 13 stoðsendingar.

Úrslitin í nótt:

Orlando 123-119 Memphis

Cleveland 108-110 LA Clippers

NY Knicks 93-111 Denver

Toronto 109-116 Oklahoma

Houston 111-105 San Antonio

Milwaukee 116-87 Miami

LA Lakers 106-111 Brooklyn