Stefnir í val milli Jóns og Hönnu

Enn hefur ekki verið leyst úr formannskrísu umhverfis- og samgöngunefndar en tvívegis hefur orðið fundarfall í nefndinni síðan upp úr sauð á fundi nefndarinnar fyrir rúmri viku. Uppnámið varð vegna endurkomu Bergþórs Ólasonar, þingmanns Miðflokksins, á formannsstól í nefndinni eftir fjarveru frá því fyrir jól í kjölfar Klausturshneykslisins.

Heimildir Fréttablaðsins herma að málið sé í algerum hnút og ekkert samkomulag í sjónmáli milli þingflokksformanna flokkanna sem hafa haft málið til umfjöllunar síðan upp úr sauð. Allir eru sagðir sammála um að Bergþóri sé ekki sætt á formannsstóli en þingflokksformenn stjórnar­meirihlutans hafa lagt áherslu á að stjórnarandstöðuflokkarnir þurfi að leysa málið sín á milli enda umrædd nefnd ein af þremur sem flokkar stjórnarandstöðunnar skipti með sér formennsku í, á grundvelli samkomulags milli stjórnar og stjórnarandstöðu. Þingflokksformenn stjórnarandstöðuflokkanna, að Miðflokki frátöldum, hafi hins vegar bent á að þeir þurfi meirihluta til að knýja fram breytingar í nefndinni og stjórnarflokkarnir þurfi því að styðja lausn á málinu.

Miðflokknum stendur til boða að setja annan mann í nefndina í stað Bergþórs en að öðrum kosti verði að kjósa annan formann úr röðum fulltrúa í umhverfis- og samgöngunefnd.

Eigi samkomulag flokkanna um formann úr minnihluta að halda, koma þrír þingmenn þar til greina; Karl Gauti Hjaltason sem er utan þingflokka, Helga Vala Helgadóttir, þingmaður Samfylkingarinnar, en hún gegnir formennsku í annarri þingnefnd, og Hanna Katrín Friðriksson, þingmaður Viðreisnar.

Nú ræðir meirihlutinn hins vegar um að tefla Jóni Gunnarssyni þingmanni Sjálfstæðisflokksins, fram sem formannsefni gegn þeim fulltrúa sem minnihlutinn mun bjóða fram.

Að óbreyttu stefnir því í að boðað verði til fundar í nefndinni í fyrramálið og tillögur, bæði meirihluta og minnihluta, um nýjan formann bornar upp til atkvæða.

Ekki liggur hins vegar beint við að atkvæði falli eftir línum stjórnar og stjórnarandstöðu. Rósa Björk Brynjólfsdóttir studdi til dæmis tillögu minnihlutans í nefndinni um að Bergþór Ólason viki sæti á hinum stormasama fundi í síðustu viku. Þá er einnig ólíklegt að Bergþór sjálfur styðji tillögu minnihlutans um nýjan formann og ekki gefið að Karl Gauti Hjaltason, sem er utan þingflokka, fylgi stjórnarandstöðuflokkunum að máli, enda sterklega orðaður við Miðflokkinn. Píratar eiga ekki fulltrúa með atkvæðisrétt í nefndinni og ekki Flokkur fólksins heldur eftir að Karl Gauti var rekinn úr flokknum.