Miklar deilur hafa staðið innan Sjómannafélags Íslands undanfarnar vikur og mánuði. Þær náðu hámarki þegar stjórn félagsins ákvað að vísa Heiðveigu Maríu úr félaginu. Hún hugðist bjóða sig fram til formennsku en eftir að hún hafði gefið það út kom á daginn að hún hefði þurft að hafa greitt félagsgjöld í þrjú ár til að teljast kjörgeng.
Jónas segir Berg aldrei hafa verið boðaðan
Heiðveig María hefur gagnrýnt stjórn félagsins harðlega, þá í því sem lýtur að ýmsum atriðum en einkum þó það hversu treglega hefur gengið að fá upplýsingar á skrifstofu félagsins.
Bergur var þannig aðalvitni Kolbrúnar Garðarsdóttur lögmanns Heiðveigar. Jónas Garðarsson, starfandi formaður, mætti hins vegar í upphafi réttarhaldanna og fullyrti við fréttamenn Vísis að Bergur hefði aldrei verið boðaður. Jónas ítrekaði í vitnastúku það sem hann hefur áður sagt að fullkomlega réttlætanlegt hafi verið að reka Heiðveigu úr félaginu.
Dómarar gera hlé meðan Bergur er kallaður til vitnis
Kolbrún Garðarsdóttir lögmaður Heiðveigar Maríu Einarsdóttur, segir ekki sannleikanum samkvæmt. Bergur hafi verið margboðaður en stjórn Sjómannafélagsins hafi síður viljað að hann gæfi skýrslu.
Niðurstöðu er að vænta innan tíðar en krafa Kolbrúnar er meðal annars sú að brottrekstur Heiðveigar Maríu verði dreginn til baka og að þriggja ára reglan svokölluð standist ekki. Það þýðir þá að stjórn gangist við því að ólöglega hafi verið staðið að síðasta stjórnarkjöri.
Uppfært 13:50
Fréttin var lagfærð vegna ónákvæmni, í fyrri útgáfu var sagt að gert hafi verið hlé á störfum réttarins til að taka afstöðu til kröfu Kolbrúnar um að Bergur mætti. Dómurinn skrapp frá meðan lögmaður SÍ hringdi í Berg.
