Starfsfólk skíðasvæðisins í Bláfjöllum segist hafa fengið flotta sendingu af snjó í nótt. Ef allt gangi upp verði opið fyrir aðgang í brekkurnar á næstu tveimur til þremur dögum.
„Gerið skíðin og brettin klár, veturinn er kominn,“ segir á Facebook-síðu Bláfjalla.
Reiknað er með því að Kóngurinn, Töfrateppið og kaðallinn verði fyrstu lyfturnar sem verða opnaðar og um leið einhverjar á suðursvæðinu.
Skíðagöngufólk gat gengið í nýtroðnum brautum um helgina.
Vefmyndavél Bláfjalla liggur niðri en unnið er að því að tengja vélina inn á ljósleiðara.
Lokað var í Hlíðarfjalli um helgina vegna hvassviðris. Þess í stað skelltu fjölmargir sér á skíði á Dalvík.
Vonast til að opna í Bláfjöllum í vikunni
