KR burstaði Grindavík | ÍR og Njarðvík einnig áfram í undanúrslitin

KR er komið í undanúrslit Geysis-bikar karla eftir stórsigur á Grindavík, 95-65, er liðin áttust við í DHL-höllinni í kvöld. Njarðvík og Skallagrímur eru einnig komin áfram.

Það var ekki mikil spenna í leik KR og Grindavíkur en KR var með góða forystu í hálfleik, 51-28. Þeir héldu uppteknum hætti í síðari hálfleik og unnu að lokum með þrjátíu stiga mun.

Julian Boyd átti frábæran leik í liði KR. Hann skoraði 25 stig, tók tíu fráköst og gaf fjórar stoðsendingar en Kristófer Acox skoraði fimmtán stig, tók níu fráköst og gaf þrjár stoðsendingar.

Það var fátt um fína drætti í liði Grindavíkur. Lewis Clinch var stigahæstur með tuttugu stig en Jordy Kuiper var með ellefu stig og átta fráköst. Ingvi Þór Guðmundsson snéri aftur í lið Grindavíkur en hann gerði tvö stig í kvöld.

Topplið Dominos-deildar karla, Njarðvík, lenti ekki í miklum vandræðum með Vestra á heimavelli. Lokatölur urðu 87-66 eftir að Njarðvík hafi verið 50-34 yfir í hálfleik. Þeir höfðu leikinn alltaf í hendi sér og sigurinn aldrei í hættu.

Stigaskorið dreifðist vel hjá Njarðvík en stigahæstur var Elvar Már Friðriksson með fjórtán stig og sex fráköst. Næstur kom Mario Matasovic með þrettán stig og sjö fráköst.

Nebojsa Knezevic var öflugastur í liði Vestra. Hann gerði átján stig auk þess að taka tíu fráköst en Jure Gunjina kom næstur með sautján stig og níu fráköst. Að auki gaf hann fimm stoðsendingar.

Mesta spennan í leikjum kvöldsins var í Breiðholtinu er Skallagrímur vann sjö stiga sigur á Skallagrím, 86-79. ÍR var tveimur stigum yfir í hálfleik, 45-43.

Sigurður Gunnar Þorsteinsson spilaði vel fyrir Breiðhyltinga í kvöld. Hann gerði 21 stig og tók þar að auki ellefu fráköst. Kevin Capers spilaði enn betur og gerði 27 stig og tók níu fráköst auk þess að gefa sjö stoðsendingar.

Aundre Jackson og Domogoj Samac voru markahæstir með tuttugu stig og Matej Buovac gerði sautján stig. Björgvin Hafþór Ríkharðsson gerði níu stig og tók sex fráköst.