Houston Texans og Seattle Seahawks úr leik

Það var aldrei spurning hvoru megin sigurinn myndi lenda í viðureign Houston Texans og Indianapolis Colts sem mættust í fyrri leik laugardagsins sem jafnframt var fyrsti leikur úrslitakeppninnar í NFL deildinni. Um helgina fer fram Wild-Card helgin og lýkur henni með tveimur leikjum í dag.

Colts áttu ekki í miklum vandræðum með Texans þrátt fyrir að leikið væri á heimavelli Texans í Houston.

Leikstjórnandi Colts, Andrew Luck, átti stórleik enda var hann í raun á heimavelli þar sem hann ólst upp í Houston. Spilamennska hans lagði grunninn að öruggum 21-7 sigri Colts en eina mark heimamanna var skorað í fjórða og síðasta leikhlutanum. 

Það var öllu meiri spenna í Dallas þar sem Dallas Cowboys fengu Seattle Seahawks í heimsókn í Þjóðardeildinni.

Eftir hörkuleik voru það heimamenn sem báru sigur úr býtum, 24-22 eftir svakalegan loka leikhluta sem fór 14-8 fyrir Cowboys.

Dallas Cowboys og Indianapolis Colts eru því komin áfram í úrslitakeppni NFL deildarinnar en í kvöld eru tveir leikir á dagskrá og lýkur þar með Wild-Card helginni.

Sunnudagur:

Kl. 18:05 Baltimore Ravens - LA Chargers (Stöð 2 Sport 3)

Kl. 21:40 Chicago Bears - Philadelphia Eagles (Stöð 2 Sport)