Friðrik úr forstjórastólnum hjá RB til Viss

Friðrik Þór Snorrason hefur verið ráðinn forstjóri hjá Viss ehf. Og verður einn af meðeigendum félagsins. Friðrik lætur af störfum sem forstjóri Reiknistofu bankanna, RB, í lok janúar eftir átta ár í starfi. Þetta kemur fram í tilkynningu frá Viss.

„Eftir að hafa stýrt víðtækum breytingum hjá RB á liðnum átta árum fannst mér kominn tími til að leita á ný mið. Sprotastarfsemi og nýsköpun hefur alltaf heillað mig. Markmið okkar hluthafana hjá Viss er að stórefla þróun tæknilausna og þjónustu félagsins og að gera Viss að öflugum samstarfsaðila smásölu- og tryggingarfyrirtækja á Íslandi,“ er haft eftir Friðriki Þór í tilkynningu.

Guðmundur Pálmason stjórnarformaður Viss segir það jafnframt mikinn feng að hafa fengið Friðrik til liðs við Viss. Þá þakkar hann fráfarandi framkvæmdastjóra Viss, Baldri Baldurssyni, fyrir samstarfið á liðnum árum, að því er fram kemur í tilkynningu.

Friðrik var framkvæmdastjóri tækni- og rekstrarþjónustu fyrirtækisins Skyggnis (nú partur af Origo) 2008-2011 og áður framkvæmdastjóri viðskiptaþróunar hjá Nýherja. Friðrik starfaði á árunum 2000-2003 sem forstöðumaður hagdeildar STRAX í Bandaríkjunum. Friðrik lauk BA-prófi í alþjóðasamskiptum frá University of Wisconsin í Bandaríkjunum 1994 og meistaraprófi í sama fagi frá London School of Economics í Englandi 1996.

Viss er sprotafyrirtæki sem sett var á laggirnar í árslok 2014. Félagið býður tryggingar fyrir farsíma. Þá var greint frá því í síðustu viku að Ragnhildur Geirsdóttir, fyrrverandi aðstoðarforstjóri WOW air, hefði verið ráðin forstjóri Reiknistofu bankanna og mun hún því taka við af Friðriki Þór.