Áramótabrennurnar í Reykjavík verða tíu talsins

Tíu áramótabrennur verða í Reykjavík og gamlárskvöld og verður eldur borinn að flestum köstunum klukkan 20:30 líkt og venjan er.

Á vef Reykjavíkurborgar segir að byrjað verði að hlaða í kestina miðvikudaginn 27. desember og er tekið fram að best sé að fá hreint timbur á brennurnar.

„Stærstur hluti þess sem fer á brennurnar eru vörubretti en einnig er fenginn afgangur af jólatréssölunni. Plast, gúmmí og unnið timbur á ekki erindi í köstinn. Starfsmenn hverfastöðva Reykjavíkurborgar verða á vettvangi við flestar brennurnar og leiðbeina þeim sem koma með efni.  Hætt verður að taka á móti efni þegar þær eru orðnar hæfilega stórar eða í síðasta lagi kl. 12.00 á gamlársdag. 

Eldur verður borinn að köstunum kl. 20.30 á gamlárskvöld á öllum stöðum með tveimur undantekningum.  Á Úlfarsfelli er tendrað kl. 15.00 um daginn og í Skerjafirði er eldur borinn að kestinum kl. 21.00 eftir blysför sem hefst kl. 20.30,“ segir í fréttinni. 

Brennurnar eru á eftirtöldum stöðum:

1. Við Ægisíðu, lítil brenna

2. Í Skerjafirði gegnt Skildinganesi 48 - 52,  (tendrað kl. 21.00, eftir blysför sem hefst kl. 20.30)

3. Við Suðurhlíðar, neðan við Fossvogskirkjugarð,

4. Laugardalur, fyrir neðan Laugarásveg 18,

5. Geirsnef, á norðanverðu Geirsnefi

6. Við Suðurfell

7. Við Rauðavatn að norðanverðu

8. Gufunes við Gufunesbæ

9. Við Kléberg á Kjalarnesi

10. Úlfarsfell á athafnasvæði Fisfélagsins ofan við Lambhagaveg, (tendrað kl. 15.00)