Miley Cyrus ljær þekktu jólalagi feminískan blæ

Bandaríska söng-og leikkonan Miley Cyrus setti sinn svip á jólalagið vinsæla „Santa Baby“ frá árinu 1953 eftir Joan Javits en Eartha Kitt söng lagið upprunalega.

Cyrus var gestur í spjallþætti hjá Jimmy Fallon á dögunum þar sem hún flutti jólalagið vinsæla en „Santa Baby“ fer í talsvert feminískari búning í meðförum söngkonunnar.

Jólalagið fjallar um konu sem biður jólasveininn um rándýrar gjafir á borð við snekkju, skartgripi og pelsa.

Cyrus hugnast ekki boðskapur textans og því ákvað hún að ljá honum feminískari blæ til að lagið væri meira í takt við tímann. Hún segist geta keypt sér alla þessa hluti alveg sjálf.

Í hinum breytta texta segir Cyrus að besti vinur konunnar sé launajafnrétti og að veraldlegir hlutir séu ekki efst á óskalistanum hennar.

„Ekki trufla mig á meðan ég tala,“ syngur Cyrus sem kærir sig auk þess ekki um óumbeðnar typpamyndir. Þá biður hún jólasveininn um að fá að vera laus við kynferðislega áreitni á vinnustað:

„Það væri gott ef þú gætir gengið úr skugga um að fáfróð fífl úr vinnunni munu ekki grípa í rassinn á mér,“ syngur Cyrus sem er komin í jólaskapið.