Mikill fjöldi missir vinnuna hjá WOW air í dag

Hundrað og ellefu fastráðnir starfsmenn WOW air misstu vinnuna í dag. Uppsagnirnar eru sagðar ná þvert á deildir og svið flugfélagsins. Starfsmönnum var tilkynnt um uppsagnirnar í morgun. Þetta var endanlega staðfest í tilkynningu sem send var til fjölmiðla nú fyrir skömmu. Rætt verður við Skúla Mogensen, eiganda WOW Air, í hádegisfréttum Bylgjunnar vegna málsins.

Í tilkynningunni kemur jafnframt fram að uppsagnirnar eru liður í gríðarlegri uppstokkun sem framundan er hjá flugfélaginu. Þotum flugfélagsins fækkar um næstum helming, voru 20 talsins en verða 11 eftir breytingarnar. Verða eingöngu flugvélar að gerðinni Airbus A321 og A320 í flota félagsins. 

Þá verða einnig gerðar breytingar á leiðakerfi félagsins. Hið nýtilkynnta flug til Nýju-Delí verður blásið af, frá og með miðjum janúar næstkomandi. Þá verður hætt að fljúga til ýmissa áfangastaða vestanhafs, til að mynda Los Angeles og Chicago. 

Berglind Hafsteinsdóttir formaður Flugfreyjufélags Íslands sagðist ekkert geta tjáð sig um málið að svo stöddu. Hún væri á fundi vegna málsins en ekki væri hægt að tjá sig fyrr en síðar í dag.

Sjá einnig: „Erfiðasti dagurinn í sögu WOW air“

Lív Bergþórsdóttir, stjórnarformaður WOW air, sagðist ekkert geta tjáð sig um málið að svo stöddu.

Viðræður á milli WOW og Indigo Partners, um kaup bandaríska félagsins á því fyrrnefnda, hafa staðið yfir undanfarna daga en engar upplýsingar hafa fengist um gang viðræðna. Síðasta tilkynning sem barst vegna viðræðnanna var fyrir rúmri viku síðan. Þá var aðeins tekið fram að góður gangur væri á viðræðunum. WOW bauð ríflega afslætti á alla áfangastaði sína í gær.

Það sem af er morgni hefur Icelandair hækkað duglega í Kauphöllinni, hækkunin nemur nú rúmum 9 prósentum. Hækkunin var hafin áður en vefmiðlar fluttu fyrstu fréttir af yfirstandandi hópuppsögnum.

Tilkynningu frá WOW sem send var út klukkan 11 má sjá að neðan.

Rekstrarbreytingar hjá WOW air

Síðastliðið ár hefur reynst WOW air mjög erfitt í rekstri og unnið hefur verið markvisst að því undanfarið að snúa rekstrinum við til hins betra og fjármagna félagið. Eins og fram hefur komið er Indigo Partners að vinna með WOW air um að tryggja langtíma fjármögnun félagsins. Liður í þeirri vinnu er að einfalda rekstur WOW air og ná arðsemi á ný en félagið skilaði hagnaði árin 2015 og 2016.

Stór hluti af þessari endurskipulagningu WOW air felst í því að fækka flugvélum úr tuttugu í ellefu og verða eingöngu flugvélar að gerðinni Airbus A321 og A320 í flota félagsins. Félagið er í samningaviðræðum um skil á nokkrum flugvélum til leigusala þar með talið öllum Airbus A330 breiðþotum. Verið er að ganga frá samningi þess efnis að selja fjórar Airbus A321 flugvélar sem verða afhentar í janúar 2019 og mun bæta lausafé félagsins um 10 milljónir Bandaríkjadala.

Það verða engar breytingar á flugáætlun í desember og byrjun janúar. Frá janúar 2019 mun félagið fljúga samkvæmt nýrri flugáætlun. Síðasta flug frá Nýju Delí er 20. janúar og frá Los Angeles 14. janúar. WOW air mun hafa samband við þá farþega sem verða fyrir áhrifum breytinga á leiðarkerfi félagsins.

Í ljósi þessara breytinga á starfsemi félagsins er því miður óumflýjanlegt að fækka í starfsmannahópi WOW air. Í dag var 111 fastráðnum starfsmönnum sagt upp störfum og ná uppsagnir starfsmanna þvert á fyrirtækið. Að sama skapi munu samningar við verktaka og tímabundna starfsmenn ekki verða endurnýjaðir að svo stöddu.Vonir standa til að stór hluti þeirra sem fengu uppsögn í dag fái tækifæri hjá félaginu að nýju.

„Þetta er erfiðasti dagurinn í sögu WOW air. Við erum með frábæran hóp af fólki sem hefur lagt hart að sér að gera WOW air að veruleika og það er því sorglegt að neyðast til að fara í þennan niðurskurð. Ég vildi óska þess að það væri til önnur leið en staðreyndin er sú að við verðum að snúa við rekstrinum og koma honum aftur í gott horf áður en við getum hafið uppbygginguna að nýju“ segir Skúli Mogensen forstjóri og stofnandi WOW air.

Eftir þessar rekstrarbreytingar munu áfram starfa hátt í þúsund manns hjá félaginu.