Héldu að uppljóstrarinn væri erlendur ferðamaður

Svo virðist sem þeir sex þingmenn sem sátu að sumbli á Klaustur bar þann 20. nóvember hafi haldið að uppljóstrarinn sem náði samræðum þeirra á upptöku hafi verið erlendur ferðamaður. 

Þar var hins vegar á ferðinni íslenskur kjósandi sem blöskraði svo orðfæri þingmannanna að hann teygði sig í þriggja ára gamlan síma sinn og hóf upptöku. Hann segist ekki fylgjast vel með þjóðmálum en þekkti Sigmund Davíð Gunnlaugsson, fyrrverandi forsætisráðherra og formann Miðflokksins. Orðfærið hafi verið slíkt að hann taldi það eiga erindi við almenning.

Þetta kemur fram í DV í dag þar sem rætt er við manninn. Nafns hans er ekki getið en hann er kallaður Marvin. Í netfangi hans kom talan 42 fyrir en nafnið og talan er vísun í Hitchhiker‘s Guide to the Galaxy. Sigmundur Davíð hefur sagt að hann telji líklegt að einhver hefði brotist inn í síma eins þeirra sem sat við borðið eða að beitt hafi verið hlerunarbúnaði. Hið rétta er að maðurinn var á nálægu borði og heyrði vel í þingmönnunum.

„Það var erfitt að greina allt sem þau sögðu en eins og ég segi, mér blöskraði það sem ég heyrði og þess vegna byrjaði ég að taka samtal þeirra upp án þess að vita nokkuð hvað ég ætti að gera við það,“ segir Marvin í samtali við DV.

Viðtalið í heild má lesa á vef DV.

Ætlaði að stoppa stutt en blöskraði ummæli um Freyju og Albertínu

Marvin hafði ætlaði sér ekki að sitja lengi við barinn en eftir um 20 mínútur byrjuðu þingmennirnir að hæðast að Freyju Haraldsdóttur og Albertínu Friðbjörgu Elíasdóttur og þá var honum nóg boðið.

„Þá fékk ég æluna upp í háls og ákvað að hér myndi ég sitja þangað til að samtali þeirra væri lokið. Þetta væri ekki í boði í siðuðu samfélagi.“

Marvin segir að þingmennirnir hafi setið að sumbli langt fram á kvöld. Upptökurnar eru rúmlega þrjár klukkustundir að lengd, í sjö hlutum og gæðin misjöfn. Hann hafi á stundum falið símann með skjölum.

„Þau veittu mér aldrei sérstaka athygli. Umræðurnar voru svo rosalegar að þau litu mjög sjaldan til mín. Þá töluðu þau svo hátt að ég hugsa að starfsfólkið á barnum, sem er í öðru rými, hefði getað náð góðum upptökum af samtali þeirra.“ 

Fólkið hafi sýnt sitt rétta eðli

„Það var ekki fyrr en þau stóðu upp og bjuggu sig undir að fara sem þau veittu mér einhverja athygli. Þegar þau voru komin fram þá minntist einhver þeirra á hvort þessi manneskja hafi verið þarna allan tímann, en þá sagði annar að ég væri erlendur ferðamaður og það þyrfti ekki að hafa neinar áhyggjur af mér.“

Maðurinn segist ekki hafa vitað hvað hann ætti að gera við upptökurnar. Hann hafi reynt að fletta upp hverjir sátu við borðið með Sigmundi Davíð en gat ekki verið viss og þess vegna hafi hann ákveðið að senda efni á fjölmiðla svo þeir gætu unnið fréttir upp úr því mikilvægasta. Hann sé ánægður hvernig til tókst.

„Stjórnmálamenn eru í valdamiklum stöðum og hafa skyldum að gegna gagnvart okkur. Þau setja upp sparibrosið fyrir kosningar en þarna held ég að þeirra rétta eðli hafi sýnt sig. Það á erindi við almenning.“