Kostnaður borgarinnar við móttökur kominn í tíu milljónir

Kolbrún Baldursdóttir, fulltrúi Flokks fólksins í borgarstjórn, segir að á fáum mánuðum séu dæmi um að borgin hafi boðið til á annan tug móttaka. „Sem ætlaðar eru skilgreindum, stundum þröngum, jafnvel elítuhópum. Allt er þetta greitt af almannafé.“

Kolbrúnu tekur það fram að sjálf hafi hún aldrei sótt slíka viðburði. Henni hefur nú borist svar við fyrirspurn sinni sem lýtur að kostnaði borgarinnar við móttökur og aðra hátíðarviðburði á vegum borgarinnar.

Kostnaðurinn sundurliðaður

2017

Veitingar kr. 8.764.319,00

Vínföng kr. 2.484.462,00

Listafólk kr. 994.500,00

Önnur aðkeypt vinna/framreiðsla kr. 4.293.072,00

Gjafir, blóm og skreytingar kr. 1.506.636

Annar tilfallandi kostnaður kr. 1.868.155

Samtals kr. 19.911.144

Það sem af er 2018

Veitingar kr. 5.205.546,00

Vínföng kr. 1.060.879,00

Listafólk kr. 711.638

Önnur aðkeypt vinna/framreiðsla kr. 2.574.546,00

Gjafir, blóm og skreytingar kr. 428.214,00

Annar tilfallandi kostnaður kr. 105.154

Samtals kr. 10.085.977

Kolbrún segir að af þessu megi sjá að á síðasta ári hafi 20 milljónir króna varið í alls kyns viðburði, veislur og móttökur. Tæpum 9 milljónum var varið í veitingar og 2.5 milljónum í vínföng. Önnur aðkeypt þjónusta eru rúma 4 milljónir.

 

Börn búa við fátækt meðan mulið er undir útvalda

Kolbrún segist vissulega gera sér grein fyrir því að mikilvægt sé að borgin komi að ýmsum viðburðum og hátíðum svo sem Barnamenningarhátíð, hátíðum og viðburðum ætlaða borgarbúum og hinum almenna starfsmanni borgarinnar.

„Hins vegar er ljóst að hér er um mikla peninga að ræða sem að hluta til er að fara í móttökur ætlaðar þröngum hópi, einhverjum útvöldum,“ segir Kolbrún. Hún vill minna á, í því samhengi, að í borginni býr fólk sem á vart til hnífs og skeiðar.

„Í borginni eru um 500 börn sem samkvæmt skilgreiningu eru fátæk. Þessi hópur sem oft er ekki háværasti hópurinn í borginni, honum er ekki boðið í fínar móttökur á vegum borgarstjóra sem greiddar eru af almannafé. Þegar kemur að kostnaði sem þessum hlýtur það að vera skylda borgarmeirihlutans að velta við hverjum steini.“