Hey til Noregs skal heilbrigðisvottað

Tæplega fjörutíu bú og átta af tuttuguogfimm varnarsvæðum á landinu hafa ekki leyfi til að flytja út hey til Noregs, ýmist vegna þess að þar hefur komið upp garnaveiki eða riða. Þeir sem hyggjast flytja út hey til Noregs eiga að senda beiðni um heilbrigðisvottorð á Matvælastofnun.

Vegna mikilla þurrka í Noregi síðustu vikur er víða skortur á heyi og hafa Norðmenn því leitað til annarra landa, m.a. til Íslands vegna innflutnings á heyi. Slíkum innflutningi getur þó fylgt áhætta þar sem smitefni geta borist á milli dýra með þessum hætti.

Matvælastofnun hefur átt í viðræðum við systurstofnun sína í Noregi, Mattilsynet, til þess að fá úr því skorið hvaða kröfur íslenskir heyframleiðendur þurfa að uppfylla til að geta flutt hey til Noregs.

Á vef Matvælastofnunar kemur fram að heimilt er að flytja hey til Noregs frá svæðum þar sem ekki eru í gildi höft vegna smitandi dýrasjúkdóma.

Landinu er skipt upp í 25 varnarsvæði og vegna riðu má ekki flytja út hey frá átta þeirra. Þá hefur komið upp garnaveiki á 39 bæjum á undanförnum tíu ár og því óheimilt að flytja út hey þaðan.

Á vef Mattilsynet kemur fram að það er innflytjandinn í Noregi sem er ábyrgur fyrir því að heyið feli ekki í sér áhættu fyrir dýr, menn eða plöntur; að það sé ræktað við aðstæður sem samræmast kröfum Evrópusambandsins og að það mengist ekki við vinnslu, flutning og geymslu.

Hey sem flutt er frá Íslandi til Noregs verður flutt beint á skilgreindar landamærastöðvar í Noregi þar sem innflutningseftirlit fer fram.

Heilbrigðisvottorð útgefið af Matvælastofnun eigi fylgja hverri sendingu af heyi. Þá geti mögulega verið óskað frekari gagna svo sem yfirlýsingu framleiðanda um að húsdýraáburður hafi ekki verið notaður á framleiðsluárinu.