Búist við svipað mörgum í vínbúðirnar fyrir verslunarmannahelgi og í fyrra

Áfengis-og tóbaksverslun ríkisins telur flest benda til þess að fjöldi viðskiptavina fyrir verslunarmannahelgina í ár verði svipaður og í fyrra. Vikan fyrir verslunarmannahelgi er jafnan ein sú annamesta í vínbúðunum.

Fjallað er um áfengissölu fyrir verslunarmannahelgar í frétt á vef ÁTVR sem birtist í dag. Þar kemur fram að vikan fyrir verslunarmannahelgi sé jafnan ein sú annamesta í Vínbúðunum á hverju ári. Um 110.000 viðskiptavinir versla í búðunum í hverri viku í júlí að jafnaði. Til samanburðar komu um 137.000 viðskiptavinir í vínbúðirnar og um 767 þúsund lítrar af áfengi seldust vikuna fyrir verslunarmannahelgi í fyrra.

Flestir koma í búðirnar á föstudeginum fyrir verslunarmannahelgi en hann er að jafnaði einn annasamasti dagur ársins. Í fyrra versluðu 38 þúsund manns í vínbúðunum á föstudeginum og 230 þúsund lítrar af áfengi seldust.

Mesta annríkið er á milli klukkan fjögur og sex síðdegis en þá koma allt að 6.400 viðskiptavinir í búðirnar á klukkustund. Þar sem mest er að gera hefur verið gripið til þess að hleypa viðskiptavinum inn í hollum.