Ragnar aftur í Þorlákshöfn

Ragnar Örn Bragason hefur ákveðið að skipta á nýjan leik yfir í Þór Þorlákshöfn í Dominos-deild karla. Hafnarfréttir greina frá.

Ragnar lék með Keflavík á ný yfirstöðnu tímabili en liðið datt út úr 8-liða úrslitunum eftir tap fyrir Haukum í bráðskemmtilegum oddaleik.

Þetta er ekki í fyrsta sinn sem Ragnar mun spila fyrir Þór því hann lék með liðinu tímabilin 2015/2016 og 2016/2017 við góðan orðstír.

„Ég er mjög ánægður að fá Ragnar aftur til liðs við okkur hér í Þorlákshöfn. Hann mun styrkja hópinn okkar og á eftir að vera öflug viðbót við Þórsliðið næsta vetur,“ segir Baldur Þór Ragnarsson, þjálfari Þórs, í samtali við Hafnarfréttir um endurkomu Ragnars.

Á síðasta tímabili spilaði Ragnar um tuttugu mínútur að meðaltali í leik fyrir Keflavík þar sem hann var með átta stig og tvö fráköst að meðaltali í leik.