Risaár framundan hjá Stjórninni sem spilar á Bræðslunni

Stjórnin kemur fram á Bræðslunni í sumar en hátíðin fer fram í fjórtánda skipti síðustu helgina í júlí. Þetta kom fram á Bylgjunni um páskana þegar Grétar Örvarsson og Sigríður Beinteinsdóttir, sem kalla mætti fyrirliða Stjórnarinnar, sátu fyrir svörum hjá Ívari Guðmundsssyni í tilefni af 30 ára afmæli sveitarinnar.

Sveitin spilaði á tveimur páskaböllum á Bryggjunni um helgina. Má segja að böllin hafi markað upphafið að dagskrá sveitarinnar á árinu en Stjórnin mun koma víða við á afmælisárinu. Grétar og Sigga greindu eins og áður segir frá fyrirhugaðri heimsókn sinni á Bræðsluna en fjölmörg önnur verkefni eru ýmist komin á dagskrá eða í deiglunni.

„Við finnum fyrir þvíð, eftir að við tilkynntum þetta afmælisár, að það er mikill áhugi að fá okkur út um allt land,“ segir Sigga Beinteins. Sveitin kom nokkrum sinnum fram á síðasta ári, spilaði meðal annars á starfsmannagleði hjá 365, og óhætt er að segja að nóg sé af slögurum í vopnabúrinu.

Þá er sveitin að velta fyrir sér útgáfu tveggja laga. Sigga liggur undir feld og veltir fyrir sér hvað gera skuli. Að sögn Grétars þurfa þau öll að vera sammála því að gefa lögin út. Sigga sé óviss.

Að neðan má heyra nokkur af lögum Stjórnarinnar.

Nóg um að vera í sumar

Grétar segir að sveitin muni troða upp á tónleikum í Skagafirði í apríl, nánar tiltekið í Menningarhúsinu Miðgarði, og í framhaldinu verði talið í á Akureyri. Svo verði nóg um að vera í sumar.

„Við látum fólk fylgjast vel með þessum uppákomum okkar í sumar, hvar þær verða hverju sinni,“ segir Grétar. 

Það sé allt í vinnslu en tímarnir séu breyttir, ekki sama sveitaballamenning og upp úr 1990 sem kalla mætti gullaldartíma Stjórnarinnar. Þá hafi verið hægt að hringja á undan sér í Ídali og Njálsbúð, beðið einhvern um að opna og svo bara hlaðið í ball.

„Við höfum áhuga á að heimsækja landsbyggðina eins og við gerðum á sínum tíma,“ segir Grétar og ljóst að Stjórnin verður á ferð og flugi í sumar. Þó líklega ekki jafnmikið og fyrir tæpum þrjátíu árum þegar sveitin var að á böllunum allt árið um kring meðfram útgáfu kasetta, platna og síðar geisladiska sem seldust í þúsundum eintaka.

Þau Grétar og Sigga hlakka sérstaklega til þess að fá alla Stjórnarliða saman enda afar margir sem eru hluti af Stjórnarhópnum, hvort sem er músíkantar sem spiluðu með, sömdu lög, texta eða útsettu. 

Allt leiði þetta að tvennum stórum afmælistónleikum sem Stjórnin ætli að halda í haust. 

Að neðan má heyra viðtal Ívars Guðmundssonar við þau Grétar og Siggu þar sem bestu lög sveitarinnar heyrast á milli þess sem gamlir og góðir tímar eru rifjaðir upp, þar á meðal tvær fræknar ferðir sveitarinnar í Eurovision 1990 og 1992. Þá rifja þau upp einu Þjóðhátíðina sem sveitin spilaði á og velta fyrir sér hvort ekki sé komið að því að endurtaka leikinn í Herjólfsdal.