Sjö ára barn í Njarðvík gaf Ragga Nat góð ráð fyrir kvöldið

Njarðvíkingar hafa tapað tveimur leikjum í röð í Domino´s deild karla í körfubolta og fengu á sig talsverða gagnrýni í síðasta Körfuboltakvöldi.

Næsti leikur liðsins er á móti bikarmeisturum Tindastóls í Ljónagryfjunni í Njarðvík í kvöld. Miðherjinn Ragnar Águst Nathanaelsson fékk góð ráð fyrir kvöldið úr óvæntri átt.

Raggi Nat eins og við þekkjum hann auglýsir leik kvöldsins á Twitter með því að vitna í ungan vin sinn frá Njarðvík eins og sjá má hér fyrir neðan.

“Segðu Loga og Maciek að taka fleiri þrista og þú alltaf troða. Ekki fara í ley-up, þú klúðrarar alltaf!!” þessi sjö ára börn í Njarðvík kunna að peppa mann upp fyrir síðasta heimaleik í deildinni... PS. 19:15 allir í Ljónagryfjuna!

— Ragnar Nathanaelsson (@RaggiNaT) March 5, 2018

Það væri nú ekki slæmt ef Logi Gunnarsson og Maciek Baginski færu að hitta betur úr þriggja stiga skotunum eða að Raggi fengi oftar boltann í úrvalsstöðu inn í teig til að troða með tilþrifum.

„Þessi sjö ára börn í Njarðvík kunna að peppa mann upp fyrir síðasta heimaleik í deildinni,“ skrifaði Ragnar og nú er að sjá hvað kappinn gerir í leik kvöldsins.

Ragnar Águst Nathanaelsson er með 7,8 stig og 8,0 fráköst að meðaltali í leik í Domino´s deildinni á þessu tímabili.

Eftir tap á móti Haukum og Keflavík er ljóst að Njarðvíkingar þurfa að passa sig ætla þeir ekki að detta niður um fleiri sæti fyrir lok deildarkeppninnar. Liðið er nú í sjötta sæti en var í fimmta sæti fyrir 21. umferðina sem lýkur í kvöld.

Njarðvík gæti dottið niður í sjöunda sætið eftir úrslitin í kvöld takist nágrönnum þeirra í Keflavík að ná þeim að stigum.