Kjartani ætlað stórt hlutverk innan Sjálfstæðisflokks

Eyþór Arnalds, leiðtogi Sjálfstæðismanna í Reykjavíkurborg, eftir öruggan sigur í leiðtogakjöri, segir það fyrirliggjandi að Kjartani Magnússyni verði ætlað stórt hlutverk innan Sjálfstæðisflokksins. Samkvæmt heimildum Vísis hefur því verið stillt upp svo að fari svo að Eyþór verði borgarstjóri í kjölfar sveitarstjórnarkosninga, þá sé Kjartani ætlað að verða aðstoðarmaður borgarstjóra. Eyþór vill ekki kveða uppúr þar um.

„Ekki er tímabært að spá í þau spil en ég get ekki ímyndað mér neinn betri.“

Þögn Kjartans Magnússonar er orðin allhávær eftir að honum var kastað út í kuldann af uppstillingarnefndinni sem raðaði upp lista Sjálfstæðiflokksins fyrir komandi borgarstjórnarkosningar. Honum, auk Áslaugar Friðriksdóttur, sem bæði hafa starfað árum saman innan borgarstjórnarflokks Sjálfstæðismanna. Mörgum þótti þau grátt leikin, ekki síst Kjartan sem hefur verið með flokkshollari mönnum.

Margir sársvekktir fyrir hönd Kjartans

Ekki þarf að leita langt í þeim efnum, fjölmörg dæmi um þessi sárindi má til að mynda finna á Facebooksíðu Kjartans sjálfs.

„Núna hefur XD tapað mínu atkvæði í borginni. Hann gjörsamlega gaf fingurinn til okkar stuðningsmanna að þessu sinni þegar vinur minn Kjartan Magnússon ekki settur á lista (átti að vera í efstu sætum) hann hefur unnið svo öflugt og óeigingjarnt starf og alltaf verið til staðar til að viðra hugmyndir td þegar ég hugsaði með mér eitt sinn að reyna fyrir mér í borgarmálum,“ segir Vilborg og heldur áfram:

Kjartan þú ert einstakur og skömm að þú verðir ekki áfram.

Vilborg ætlar að horfa til Miðflokksins þar sem hún segir mikið af góðu fólki.

Jón Arnar Sigurjónsson er annar og honum er beinlínis brugðið að sjá Kjartan ekki á listanum. „Kjartan sem hefur verið einn mesti vinnuhesturinn í borgarmálunum og duglegur í að berjast fyrir málefnum flokksins. Hvað gerðist eiginlega?“ Og þannig má áfram telja.

Fjölmiðlar hafa reynt ítrekað að ná tali af Kjartani allt frá því að fyrir lá að hann yrði ekki á lista en án árangurs. Áslaug Friðriksdóttir sendi frá sér yfirlýsingu og lýsti yfir óánægju sinni með að leikreglum hafi verið hagrætt. En, Kjartan þegir.

Má ekkert aumt sjá

Vísir heyrði stuttlega í Kjartani síðdegis í gær en þá sagðist hann ekki ætla að tjá sig um málið. Sagði þó að hann styðji listann og flokkinn.

Eyþór segir hins vegar ekki nokkra spurningu um að hann vilji vinna með Kjartani. „Það er full þörf fyrir Kjartan, ekki bara í þessari baraáttu heldur einnig fyrir íbúana. Vart er til hjálpsamlegri maður en Kjartan Magnússon.“

Eyþór segir Kjartan harðduglegan. „Og hann má ekkert aumt sjá og alltaf tilbúin að hlusta á fólk sem er mikilvægur eiginleiki og því mikilvægt að hann sé með okkur. Hann hefur mikla reynslu sem við viljum ekki glata. Þannig er að í góðu liði eru ekki bara frambjóðendur heldur þarf þetta allt að spila saman, eins og gott fótboltalið.“

Ekki síður horft til Kjartans að loknum kosningum

Fyrir liggur að margir eru sársvekktir fyrir hönd Kjartans en Eyþór eyðir því tali. „Ég hef þekkt Kjartan lengi. Andrés bróðir hans var með mér í bekk og ég var heimagangur hjá þeim bræðrum. Það þykir öllum vænt um Kjartan. Við erum að stilla upp liði, ekki bara frambjóðendum, sem ætlar að vinna saman á breiðum grundvelli. Kjartan verður hluti af þeirri heild,“ segir Eyþór.

Hann ítrekar að Kjartani sé ætlað hlutverk í kosningabaráttunni. „Og ekki síður eftir. Þetta snýst ekki bara um að vinna kosningar heldur taka við stjórninni og láta gott af sér leiða. Og þar er ég viss um að Kjartan geti gert mikið með okkur.“