Miklar líkur á dimmri snjó­komu í morgun­um­ferðinni

Akstursskilyrði verða víða erfið í dag, ekki síst á höfuðborgarsvæðinu þar sem él, skafrenningur og snjókoma munu torvelda akstur. Gular viðvaranir eru í gildi fyrir allt landið, að frátöldu hálendinu og Breiðafirði.

Ökumenn um allt land ættu því að flýta sér hægt núna í morgunsárið og þá sérstaklega á landsbyggðinni þar sem Veðurstofan gerir ráð fyrir samgöngutruflunum í dag. Vindhraðinn verður að jafnaði á bilinu 15 til 23 m/s í dag og verður víða vægt frost en það gæti haldist frostlaust allra austast á landinu.

Þetta kemur fram í ábendingu frá veðurfræðingi Vegagerðarinnar sem segir útlit fyrir talsverða snjókomu Suðaustanlands, frá Vík og austur á firði. Veðurstofa Íslands hefur varað við þeirri lægð sem fer norðvestur yfir landið í dag með hvassviðri eða snjókomu víða.

Líkur eru á muggu, snjókomu í logni, á Vestfjörðum í morgunsárið en vaxandi skafrenningi etir því sem líður á daginn.

Sem fyrr segir er útlit fyrir mikla snjókomu suðvestanlands á milli klukkan sex og níu í dag. 

Veðurhorfur á landinu næstu daga:

Á miðvikudag:

Austan 15-23 m/s, en 23-30 syðst. Lægir eftir hádegi, fyrst með suðurströndinni, allvíða austan 8-15 undir kvöld. Snjókoma eða slydda, einkum á austurhelmingi landsins, en rigning með austurströndinni. Hlýnar í veðri, hiti kringum frostmark síðdegis.

Á fimmtudag:

Austlæg átt 3-10, en norðaustan 10-15 á Vestfjörðum. Yfirleitt þurrt á Vesturlandi, annars dálítil él. Víða frostlaust við ströndina, en vægt frost til landsins.

Á föstudag og laugardag:

Suðvestan 8-13 m/s og él, en hægari vindur og bjartviðri á Norður- og Austurlandi. Hiti rétt ofan frostmarks við suður- og vesturströndina, annars frost 1 til 7 stig.

Á sunnudag:

Hæglætisveður og þurrt framan af degi og frost um allt land. Gengur í hvassa suðaustanátt seinnipartinn með snjókomu eða slyddu og síðar rigningu sunnan- og vestanlands. Hlýnar í veðri.

Á mánudag:

Snýst í suðvestanátt með slydduéljum eða éljum, en léttir til fyrir norðan og austan. Kólnar smám saman.

Fréttin var uppfærð kl. 6:15, 13. febrúar.