Dásamleg ástaröskur í Sundhöllinni á Selfossi

„Ef þetta er ekki dásamlegt, þá veit ég ekki hvað orðið dásamlegt þýðir,“ segir fréttamaðurinn skeleggi, Magnús Hlynur Hreiðarsson.

Magnús Hlynur var, eins og svo oft, í sundi í morgun. Á sínum heimaslóðum, Sundhöll Selfoss. Og þar varð hann vitni að frumlegum ástaratlotum sem gripu athygli sundlaugargesta og áttu hana óskipta. Ekki síst fréttamannsins sem hefur komið víða við og margt upplifað.

Magnús Hlynur kann auðvitað best að lýsa þessu sjálfur. Beint af vettvangi:

„Dásamlegt að sjá ungt og ástfangið par velta sér í snjónum á svæðinu við Sundhöll Selfoss í morgun í sundfötunum einum fata, hentu snjó í hvort annað, öskruðu ástaröskri, föðmuðust og hlupu svo á fullu í heita pottinn til að hlýja sér. Þetta gerðu þau tvisvar meðan ég var að synda, ég hvatti þau áfram á milli sundtaka,“ segir Magnús Hlynur, ánægður með lífið og tilveruna.