Serbar síðasta liðið til að tryggja sér sæti í undanúrslitum á EM

Bogdan Bogdanovic skoraði 22 stig, tók sex fráköst og gaf fjórar stoðsendingar þegar Serbía tryggði sér sæti í undanúrslitum á EM í körfubolta með 67-83 sigri á Ítalíu í kvöld.

Sigur Serba var nokkuð öruggur en þeir leiddu lengst af. Staðan í hálfleik var 33-44, Serbíu í vil.

Serbneska liðið hafði mikla yfirburði í frákastabaráttunni sem það vann 44-19.

Bogdanovic var atkvæðamestur í liði Serba. Fyrirliðinn Milan Macvan skoraði 13 stig, tók sex fráköst og gaf þrjár stoðsendingar.

Marco Bellinelli var stigahæstur í ítalska liðinu með 18 stig en hann var aðeins með 29,4% skotnýtingu. Luigi Datome skoraði 15 stig.

Serbar mæta Rússum í undanúrslitunum á föstudaginn.