Martin: Ég hef aldrei séð það áður hjá íslensku landsliði

Martin Hermannsson er ekkert hrifnari af keppnisboltanum eftir nóttina. Forráðamenn evrópska körfuboltasambandsins voru nefnilega ekki að gera íslensla körfuboltalandsliðinu neinn greiða þegar þeir völdu keppnisboltann fyrir Eurobasket 2017.

„Það gengur illa að venjast þessum bolta en vonandi verður þetta allt í lagi á morgun," sagði Martin Hermannsson aðspurður um hvernig nótin með keppnisboltanum hafði gengi. Hann lofaði því eftir Grikklandsleikinn að hann ætlaði að sofa með boltann til að venjast honum betur.

Martin og strákarnir í körfuboltalandsliðinu eru flestir mjög óánægðir með keppnisboltann á Eurobasket sem er allt annar bolti en þeir eiga að verjast. Það fór ekki framhjá neinum sem sá leikinn við Grikki að hann var oft eins og sápustykki í höndunum á íslensku bakvörðunum.

„Ég þarf bara að hætta að hugsa um þetta því ég má ekki einbeita mér alltof mikið að þessu. Þeir eru að spila með sama bolta og ég. Þeir settu niður þriggja stiga skot í gær þannig að ég ætti að geta gert það líka,“ sagði Martin.

Framundan er leikur á móti Pólverjum á morgun en pólska liðið tapaði með níu stiga mun á móti Slóvenum í sínum fyrsta leik.

„Þetta verður erfitt. Þeir eru með sterka leikmenn og ef einhver einn á lélegan leik þá er bara sá næsti sem stígur fram. Við þurfum svolítið að einbeita okkur að þeirra veikleikum sem við höldum að við séum búnir að finna. Vonandi gengur það upp á morgun,“ sagði Martin.

Eitt þarf að lagast hjá íslenska liðinu og það eru skotin fyrir utan þriggja stiga línuna en aðeins 6 af 61 stigi Íslands í tapleiknum á móti Grikklandi komu eftir heppnuð skot fyrir utan þriggja stiga línuna.

„Við þurfum líka að hitta. Það gengur ekki að hitta aðeins úr 2 af 23 þriggja stiga skotum. Ég hef aldrei séð það áður hjá íslensku landsliði,“ sagði Martin.

Ítalska landsliðið skoraði þrettán þriggja stiga körfur í sínum fyrsta leik á EM sem var á móti Ísrael eða ellefu fleiri þrista en íslenska liðið. Martin var með svar við þessu?

„Þeir hljóta að vera með einhvern annan bolta," sagði Martin hlæjandi.