"Þetta stóriðjuskeið er bara liðið hjá"

Kerfisbundin mótmæli tveggja lækna gegn Hvalárvirkjun hófust í byrjun mánaðarins. Daglega munu þeir birta myndir af fossum sem verða undir ef af framkvæmdunum verður.

Læknarnir Tómas Guðbjartsson og Ólafur Már Björnsson fóru í sumar í tvær ferðir á Ófeigsfjörð í Árneshreppi þar sem til stendur að reisa Hvalárvirkjun. Þar tóku þeir myndir sem þeir ætla að birta daglega í september til að vekja athygli á náttúrufegurð svæðisins.

„Þetta svæði er bara einstakt. Ekki bara á Íslandi heldur víðar. Öll þekkjum við Hornstrandir og allir Íslendingar eru stoltir af því að eiga það svæði. Þetta er bara í dyragættinni," segir Tómas Guðbjörnsson. 

Verkefnisstjórn rammaáætlunar hefur sett Hvalárvirkjun í orkunýtingarflokk en þar stendur til stendur að virkja Hvalá, Rjúkanda og Eyvindafjarðará. Á svæðinu er gert er ráð fyrir fimm stíflum, fjórum lónum, skurðum, göngum, stöðvarhúsi og veglagningu.

Tómas segir ekki of seint að hætta við áformin og ætlar að senda afrakstur fossadagatalsins á ráðamenn.

„Þar að auki ætlum við að taka þessar myndir, gefa þær út í litabæklingi og senda á alla alþingismenn, sveitastjórnarmenn á Vestfjörðum, þá sem ráða ríkjum í HS Orku og Vesturverki, þá sem sitja í rammaáætlun, Skipulagsstofnun og Umhverfisstofnun. Þannig að fólk sé virkilega með það á hreinu hvað sé undir. Vegna þess að ég held að það sé stærsta vandamálið. Að fólk sé ekki nógu vel upplýst," segir Tómas.

Tómas vonast til þess að myndirnar lýsi náttúrufegurðinni sem er í húfi.

„Í sumum af þessum fossum eða ám mun rennslið minnka verulega, eða um 30 til 40%, sem er að mínu mati óásættanlegt. En fallegustu fossarnir eins og Drynjandi munu að langmestu leyti þurrkast upp," segir hann.

Hann bendir á að virkjanir séu að mestu leyti að framleiða orku fyrir stóriðju. „Ég held að það sé mikilvægt núna að staldra við og spyrja; hvert erum við Íslendingar að fara. Þetta stóriðjuskeið er að mínu mati bara liðið hjá," segir Tómas.