Óli Palli og Stella selja einbýlishúsið: Frú Stella ætlar með mig aftur heim á Akranes

Ólafur Páll Gunnarsson, eða Óli Palli eins og hann er kallaður, og eiginkona hans Stella María Sigurðardóttir hafa sett einbýlishús sitt við Lóuhraun á sölu.

Ásett verð er 78,9 milljónir en fasteignamatið er 55 milljónir. Um er að ræða vel skipulagt fimm herbergja tvö hundruð fermetra timburhús á tveimur hæðum að meðtöldum 32 fermetra bílskúr í Hafnarfirði.

Garðurinn er virkilega fallegur með veröndum og skjólveggjum á þrjá vegu ásamt heitum potti. Húsið var byggt árið 2000.

„Eftir 27 ár á höfuðborgarsvæðinu og 16 frábær í Hafnarfirði hefur frú Stella ákveðið að fara með mig aftur heim á Akranes (ef allt gengur upp og lukkan verður með okkur í liði áfram). Húsið er æðislegt eins og umhverfið, staðsetningin etc. - og nágrannarnir eru frábærir,“ segir Óli Palli í stöðu færslu á Facebook.

Hér að neðan má sjá myndir af eigninni.