Viðar sagður undir smásjá Newcastle

Forráðamenn Newcastle hafa áhuga á Viðari Erni Kjartanssyni, leikmanni Maccabi Tel Aviv, ef marka má frétt Daily Star í dag. Newcastler er sagt reiðubúið að bjóða átta milljónir punda í sóknarmanninn, jafnvirði rúmlega milljarðs króna.

Viðar Örn hefur skorað mikið með Maccabi síðan hann gekk í raðir félagsins á síðasta ári og haldið uppteknum hætti í upphafi nýs tímabils.

Viðar hefur skorað mikið hvar sem hann hefur spilað, með Vålerenga í Noregi, Malmö í Svíþjóð og Jiangsu Sainty í Kína. Hann varð markahæsti leikmaður ísraelsku deildarinnar á síðasta tímabili með fimmtán mörk.

Daily Star segir að útsendarar Newcastle hafi fylgst með Viðari Erni í leik Maccabi gegn Altach í forkeppni Evrópudeildar UEFA en Viðar Örn skoraði þá eina mark leiksins.

Samkvæmt fréttinni hafa önnur lið í ensku úrvalsdeildinni verið að fylgjast með kappanum, sem og lið í ensku B-deildinni.