Enn hryggur tíu árum síðar: „Mun aldrei nokkurn tímann komast yfir þetta“

Allardyce hafði aðeins stýrt enska liðinu í einum leik þegar honum var sagt upp eftir 67 daga í starfi í september árið 2016. Blaðamaður frá Daily Telegraph hafði þá þóst vera kaupsýslumaður frá austurlöndum fjær og tóku Allardyce leynilega upp á fundum þar sem enski þjálfarinn benti þeim á leiðir framhjá reglum enska knattspyrnusambandsins um eignarhald þriðja aðila á leikmönnum.

Enska knattspyrnusambandið sagði Allardyce hafa sýnt af sér „alvarlegt dómgreindarleysi“ og sagði hann ekki hæfan landsliðsþjálfarastöðunni vegna málsins. Gareth Southgate tók við liðinu sem lenti í fjórða sæti á HM 2018 og öðru sæti á EM 2020.

Uppsögnin situr enn í Allardyce áratugi síðar.

„Ég lít auðvitað til baka á þetta með mikilli sorg. Ég mun aldrei nokkurn tímann komast yfir þetta. Það er í rauninni stysta svarið, varðandi skilningsleysi enska knattspyrnusambandsins á sínum tíma,“ segir Allardyce í hlaðvarpi Peter Crouch.

„Hvað varðar það að fá ekki tækifæri til að verja mig, ákvörðun sem þeir tóku bara á einum degi án þess að leyfa mér að segja: ‚Ég er ekki sekur um þetta,‘ sem ég var ekki,“ segir Allardyce en eftir að klippur af leynilegum upptökum Telegraph af fundinum með Allardyce fór í loftið var hann fokinn innan við degi síðar.

„Svo tóku þeir auðvitað ákvörðunina, bara strax, bang. Einhver hlýtur að hafa hrætt þá til að taka þessa ákvörðun í flýti.“