Ætla að útfæra leiðsögn fyrir krabbameinsveika

Heilbrigðisráðherra vill taka upp leiðsögumenn sem myndu hjálpa krabbameinsveikum að rata um heilbrigðiskerfið. Hann ætlar að þrýsta á lækkun á þaki á greiðsluþátttöku sjúklinga og segir að ráðist verði í vinnu við krabbameinsáætlun í haust.

Fjallað var um mál Láru Guðrúnar Jóhönnudóttur í Fréttablaðinu um helgina og kvöldfréttum í gær. Hún var greind með brjóstakrabbamein í febrúar en móðir hennar lést úr sama meini fyrir sautján árum. Frá greiningu hefur hún þurft að leggja út tæplega 1,4 milljónir króna í kostnað vegna meðferðar. Hún telur ríkið eiga taka frekari þátt í kostnaði krabbameinssjúkra sem eigi allra síst að hafa fjárhagsáhyggjur á þessum tíma. „Eins og til dæmis Óttarr Proppé, heilbrigðisráðherra, ég efast um að hann vilji vera ráðherra og tilheyra samfélagi þar sem þú þarft að slá lán hjá tengdaforeldrum þínum til þess að fara í gegnum eggheimtu. Svo að þú eigir einhvern möguleika á því að geta stofnað fjölskyldu eftir meðferð," segir Lára Guðrún Jóhönnudóttir. 

Tillaga að íslenskri krabbameinsáætlun var birt fyrr í mánuðinum eftir miklar tafir þar sem birting hafði áður verið boðuð í árslok 2014. Ísland er eitt Norðurlandanna sem ekki hefur lokið við gerð krabbameinsáætlunar en til samanburðar má nefna að sambærileg áætlun var lögð fram árið 1998 í Noregi.

Í maí var tekið upp nýtt greiðsluþátttökukerfi sem setur þak á kostnað sjúklinga. Heilbrigðisráðherra segir að þakið verði lækkað á næstunni.

„Við viljum gera betur og höfum gert ráð fyrir í fjármálaáætlun næsta árs auknu fjármagni til að lækka kostnaðarþátttöku sjúklinga þrátt fyrir að við eigum eftir að útfæra það hvernig er best að skila þeim peningum. Hvaða póstum er best að vinna í," segir Óttarr Proppé, heilbrigðisráðherra.

Hann segir mikilvægt að bæta upplýsingagjöf til sjúklinga og verða ábendingar um nokkurs konar leiðsögumenn sem myndu vísa sjúklingum um kerfið teknar upp við áframhaldandi vinnu að krabbameinsáætlun í haust.

„Þetta er náttúrulega mjög flókið kerfi og flókin meðferð oft og það er nokkuð sem ég vil gjarnan beita mér fyrir," segir Óttarr.