Þrjú í haldi í Frakklandi grunuð um aðild að 30 ára gömlu, óupplýstu morðmáli

Par á áttræðisaldri og ein kona hafa verið handtekin grunuð um aðild að rúmlega 30 ára gömlu, óupplýstu morðmáli í Frakklandi. Glæpurinn vakti á sínum tíma mikinn óhug í landinu en Grégory Villemin var aðeins fjögurra ára gamall þegar hann fannst látinn í Vologne-ánni í austurhluta Frakklands.

Morðingi Villemin litla fannst aldrei en að því er fram kemur í frétt BBC um málið eru þau þrjú sem eru í haldi nú öll skyld föður drengsins. Morðmálið er eitt hið dularfyllsta í sögu Frakklands en með nýrri tækni við að greina DNA komst skriður á málið að nýju.

Foreldrarnir fengu bréf frá hugsanlegum morðingja

Lík Villemin fannst í Vologne-ánni þann 16. október 1984 en klukkustundum áður en líkið fannst kvaðst frændi Villemin hafa fengið símtal um að drengnum hefði verið rænt. Daginn eftir fengu foreldrar Villemin svo bréf sem í stóð að drengurinn væri látinn og þannig hefði bréfritarinn náð fram hefndum.

Í nóvember var svo frændi föðurins handtekinn í kjölfar þess að mágkona frændans bar vitni gegn honum. Maðurinn var hins vegar látinn laus árið 1985 í kjölfar þess að mágkonan dró vitnisburð sinn til baka en nokkrum vikum síðar skaut faðir Villemin frændann til bana.

Frændi, frænka og hálfsystir í haldi

Faðirinn fór því í fangelsi fyrir morðið á frændanum og sat inni í nokkur ár. Móðir Villemin, Christin Villemin, var svo fangelsuð fyrir að hafa átt aðild að morðinu á syni hennar en hún var hreinsuð af öllum ásökunum auk þess sem hún fékk skaðabætur fyrir að hafa verið borin röngum sökum.

Símtölin og bréfin héldu áfram að berast og málið var í tvígang opnað á ný, annars vegar árið 2000 og hins vegar árið 2008. Gerðar voru tilraunir til að greina DNA-sýni á bréfunum og fundust þrjú mismunandi sýni en ekki var hægt að finna út úr hverjum þau voru.

Lítið hefur gerst í málinu síðan þar til í morgun þegar þremenningarnir voru handteknir. Heimildarmenn segja frönskum fjölmiðlum að parið, kona og maður, séu frændi og frænka föður Villemin. Þá er talið að konan sem sé í haldi sé hálfsystir föðurins.